पेट्रोल पंपावरील निष्काळजीपणा मुळे चिमुकल्याचा घात 

नांदेड (प्रतिनिधी) – काही क्षणांचा निष्काळजीपणा आणि एका कुटुंबाचे आयुष्य कायमचे उद्ध्वस्त झाले. नांदेड शहरातील देगलूर नाका परिसरातील एका पेट्रोल पंपावर घडलेल्या हृदयद्रावक अपघातात अवघ्या तीन वर्षीय चिमुकल्याचा कारच्या धडकेत मृत्यू झाला. या दुर्दैवी घटनेमुळे संपूर्ण परिसरात शोककळा पसरली असून, आई समोरच त्यांच्या काळजाच्या तुकड्याने अखेरचा श्वास घेतल्याने उपस्थितांच्याही डोळ्यांत अश्रू तरळले.

परभणी जिल्ह्यातील एक दाम्पत्य आपल्या तीन वर्षीय मुलासह नांदेड येथील सासुरवाडीत आले होते. सर्व काही सुरळीत सुरू असताना देगलूर नाका भागातील एका पेट्रोल पंपावर त्यांनी दुचाकीत इंधन भरण्यासाठी थांबा घेतला. याचवेळी त्यांच्या आयुष्याला दुःखाचा काळा डाग लागणार आहे, याची कोणालाही कल्पना नव्हती. पेट्रोल भरत असताना शेख सयान हा तीन वर्षीय चिमुकला दुचाकीवरून खाली उतरला. शेख सयान लक्ष काही क्षणांसाठी दुसरीकडे असतानाच तो पंपाच्या परिसरात पुढे गेला. त्याचवेळी समोरून एक कार येत होती. क्षणार्धात घडलेल्या या घटनेत कारची धडक बसून सयान गंभीर जखमी झाला. काही सेकंदांतच आनंदी वातावरण दुःखात बदलले.

अपघात होताच महिलांनी एकच आक्रोश केला. आपल्या लेकराला रक्ताच्या थारोळ्यात पाहून त्यांनी हंबरडा फोडला. पेट्रोल पंपावरील कर्मचारी आणि नागरिकांनी तातडीने धाव घेत जखमी बालकाला रुग्णालयात दाखल केले. मात्र, डॉक्टरांनी तपासणीनंतर त्याला मृत घोषित केले. ही बातमी समजताच कुटुंबीयांवर दुःखाचा डोंगर कोसळला. घटनेनंतर काही काळ पेट्रोल पंपावर गोंधळाचे वातावरण निर्माण झाले होते. नेमका अपघात कसा घडला, याचा सुरुवातीला कोणालाही अंदाज येत नव्हता. मात्र, पंपावरील सीसीटीव्ही फुटेज तपासल्यानंतर संपूर्ण प्रकार स्पष्ट झाला. चिमुकला अचानक वाहनाजवळून पुढे गेल्याने ही दुर्घटना घडल्याचे फुटेजमध्ये दिसून आले.

या हृदयद्रावक घटनेने पालकांसाठी एक महत्त्वाचा धडा दिला आहे. पेट्रोल पंप, रस्ते, पार्किंग किंवा वाहनांची मोठी वर्दळ असलेली ठिकाणे ही लहान मुलांसाठी अत्यंत धोकादायक असतात. अशा ठिकाणी मुलांवर क्षणभरही दुर्लक्ष करणे जीवघेणे ठरू शकते. आजच्या धावपळीच्या जीवनात प्रत्येकालाच घाई असते. मात्र, काही क्षणांचा संयम आणि सतर्कता एखाद्या निष्पाप जीवाचे प्राण वाचवू शकते. शेख सयानच्या मृत्यूने एका कुटुंबाचे सर्वस्व हिरावून घेतले आहे. या चिमुकल्याच्या अकाली जाण्याने प्रत्येक पालकाने सावध राहण्याची गरज अधोरेखित झाली असून, अशा दुर्घटना पुन्हा घडू नयेत, हीच समाजाची अपेक्षा आहे.

अपघात करणारी गाडी क्रमांक MH ४९ BW २५८८ इतवारा पोलिसांनी आणून पोलीस ठाण्यात उभी केली आहे.पण अद्याप वृत्त लिही पर्यंत गुन्हा दाखल झाला नव्हता कारण शेख सयानच्या नातेवाईकांनी अंतिम क्रिया करून तक्रार देतो असे पोलिसांना सांगितले आहे.चिमुकल्या अपघात घडवणारी गाडी आकेफा शाहीन  जमाल हमीद खान यांच्या नावावर नोंदणी कृत आहे.या वाहनावर ८ हजार रुपये दंड असल्याचे सुद्धा दिसते. या वाहनाचा विमा २१ ऑगस्ट २०२५ रोजीच समाप्त झालेला आहे.हि सर्व माहिती परिवहन विभागाच्या अप वर दिसत आहे.