नांदेड (प्रतिनिधी)- वीज वितरण कंपनीच्या कारभारातील अनागोंदी आणि ग्राहकांची होणारी फसवणूक वास्तव न्यूज लाईव्हने चव्हाट्यावर आणल्यानंतर खळबळ उडाली आहे. या बातमीची दखल घेत वीज वितरण कंपनीचे सहाय्यक अभियंता विनोद जाधव यांनी संबंधित ग्राहकाची भेट घेतली, मात्र त्यांनी दिलेला खुलासा ग्राहकाचे समाधान करण्याऐवजी कंपनीची चालबाजी अधिक स्पष्ट करणारा ठरला आहे.
नेमके प्रकरण काय? वजिराबाद परिसरातील एका ग्राहकाला दोन महिन्यांचे एकत्रित बिल देण्यात आले. इंजिनिअर जाधव यांच्या दाव्यानुसार, दोन महिन्यांची एकूण रीडिंग ७१५ युनिट आली होती. मागील जून महिन्यात ग्राहकाला सरासरी बिल देण्यात आले होते आणि या महिन्यात ती सरासरी वजा करून उर्वरित युनिट्सचे बिल देण्यात आले. मात्र, या तांत्रिक खेळात ग्राहकाचे आर्थिक नुकसान झाले आहे.
तज्ज्ञांचे मत आणि तांत्रिक फसवणूक: या प्रकरणावर तज्ज्ञांशी चर्चा केली असता, कंपनीच्या धोरणातील त्रुटी समोर आल्या आहेत. तज्ज्ञांच्या मते, जेव्हा दोन महिन्यांची रीडिंग एकदम (७१५ युनिट) घेतली जाते, तेव्हा वीज दराचा स्लॅब बदलतो आणि अधिभार (Surcharge) वाढतो. जर दरमहा रीडिंग घेतली असती, तर ग्राहकाला कमी दराने बिल आले असते. ७१५ रीडिंग एकदम दाखवल्यामुळे सर्व कॅल्क्युलेशन बिघडले आणि बिल अव्वाच्या सव्वा आले.
आर्थिक भुर्दंड:
- सबंधित ग्राहकाने दोन महिन्यात १०,००० रुपयांपेक्षा जास्त रक्कम भरली आहे.
- ग्राहकाचे सरासरी मासिक बिल साधारण ३,५०० रुपये येते, मात्र या पद्धतीमुळे त्याला प्रत्येक महिन्याला ५,००० रुपयांचा फटका बसला आहे.
- मागील महिन्याचे ३,०८३ रुपये आणि या महिन्याचे ६,५९० (अंदाजे) रुपये मिळून ग्राहकाला मोठा आर्थिक फटका बसला आहे.
जबाबदारी कुणाची? अनेदा डोअर लॉक (घर बंद) असल्याचे कारण सांगून सरासरी बिल दिले जाते. मात्र, घर खरंच बंद होते का? आणि हे कोण सिद्ध करणार? या प्रश्नावर अभियंता विनोद जाधव यांनी असमर्थता दर्शवली. रिडींग वेळेवर न घेणे आणि त्यानंतर एकत्रित रिडींग दाखवून वाढीव दराने बिल वसूल करणे, हा एक प्रकारचा फसवणुकीचा प्रकार असल्याचे चित्र दिसत आहे. या प्रकरणावरून वीज वितरण कंपनी आपल्या तांत्रिक चुकांची जबाबदारी ग्राहकांवर ढकलत असल्याचे स्पष्ट होत असून, सामान्य ग्राहकांमधून संताप व्यक्त केला जात आहे.
संबंधित बातमी ….
स्मार्ट मीटरला नकार देणाऱ्या ग्राहकांचा छळ? वाढीव वीज बिलांवर प्रश्नचिन्ह
