नांदेड पोलीस अधीक्षक कार्यालयात शांतता समितीची बैठक; ईद-ए-मिलाद-उन-नबी शांततेत व सुरक्षित वातावरणात साजरी करण्याचे आवाहन

नांदेड (प्रतिनिधी)-  नांदेड जिल्ह्यात आगामी २६ ऑगस्ट २०२६ रोजी साजरी होणाऱ्या ईद-ए-मिलाद-उन-नबी (हजरत मोहम्मद पैगंबर जयंती) उत्सवाच्या पार्श्वभूमीवर, पोलीस अधीक्षक कार्यालय, नांदेड येथील मंथन हॉलमध्ये २१ ऑगस्ट २०२६ रोजी सायंकाळी ५.०० वाजता शांतता समितीची बैठक आयोजित करण्यात आली होती. या बैठकीत आगामी सण शांततेत, सुरक्षित व सौहार्दपूर्ण वातावरणात पार पाडण्यासाठी सामाजिक सलोखा राखण्याचे आवाहन पोलीस प्रशासनातर्फे करण्यात आले आहे.

पोलीस अधिकारी आणि प्रतिष्ठित नागरिकांची उपस्थिती या बैठकीस नांदेडचे पोलीस अधीक्षक डॉ. नीलाभ रोहन, अपर पोलीस अधीक्षक सूरज गुरव, उपविभागीय पोलीस अधिकारी, तसेच शहरातील सर्व पोलीस ठाण्यांचे प्रभारी अधिकारी, स्थानिक गुन्हे शाखा आणि जिल्हा विशेष शाखेचे संबंधित अधिकारी उपस्थित होते. यासोबतच नांदेड शहरातील मुख्य धर्मगुरू (मौलाना), विविध मशिदी व ईदगाह कमिटीचे पदाधिकारी, सदस्य आणि शहरातील प्रतिष्ठित नागरिक मोठ्या संख्येने उपस्थित होते.

सोशल मीडियावरील अफवांना बळी न पडण्याचे आवाहन बैठकीत कायदा व सुव्यवस्था अबाधित राखण्याबाबत सविस्तर चर्चा करण्यात आली. उत्सवाच्या काळात सोशल मीडियावर प्रसारित होणाऱ्या कोणत्याही अफवा, चुकीच्या पोस्ट किंवा धार्मिक तेढ निर्माण करणाऱ्या चिथावणीखोर संदेशांवर नागरिकांनी विश्वास ठेवू नये आणि असे संदेश पुढे फॉरवर्ड करू नयेत, असे आवाहन करण्यात आले आहे. कोणत्याही आक्षेपार्ह मेसेजला स्वतः प्रतिक्रिया न देता नागरिकांनी तात्काळ पोलीस प्रशासनाला माहिती द्यावी. तसेच, तरुणांनी धार्मिक भावना दुखावतील असे कोणतेही कृत्य करू नये आणि समाजकंटकांना कोणत्याही प्रकारे प्रोत्साहन मिळणार नाही याची दक्षता घ्यावी, अशा सूचना देण्यात आल्या.

ध्वनिक्षेपक व वाहतूक नियमांचे पालन आवश्यक धार्मिक कार्यक्रम आणि मिरवणुकीदरम्यान ध्वनिक्षेपकाचा (लाऊडस्पीकर) वापर निर्धारित नियमांनुसारच करावा, असे निर्देश पोलीस अधीक्षकांनी दिले. तसेच मिरवणुकीमुळे किंवा कार्यक्रमांमुळे वाहतुकीस कोणताही अडथळा निर्माण होणार नाही याची सर्व संबंधितांनी काळजी घ्यावी आणि सार्वजनिक ठिकाणी शिस्त पाळावी, असे मार्गदर्शन करण्यात आले.

नांदेड पोलीस सुरक्षेसाठी सज्ज उत्सवाच्या पार्श्वभूमीवर नांदेड पोलिसांकडून आवश्यक त्या सुरक्षा आणि बंदोबस्ताच्या उपाययोजना करण्यात येत असून पोलीस प्रशासन नागरिकांच्या सुरक्षिततेसाठी पूर्णपणे सज्ज आहे. नागरिकांनी कायद्याचे पालन करून पोलिसांना सहकार्य करावे आणि नांदेडच्या सामाजिक ऐक्य व बंधुभावाची परंपरा कायम राखावी, असे आवाहन पोलीस विभागाने केले आहे. 

Kanthak Suryatal