तिर्रट जुगार अड्ड्यावर नांदेड ग्रामीण पोलिसांचा छापा; तिघे ताब्यात, ₹४.१४ लाखांचा मुद्देमाल जप्त

नांदेड (प्रतिनिधी) –  नांदेड जिल्ह्यात सुरू असलेल्या अवैध धंद्यांविरोधातील विशेष मोहिमेअंतर्गत नांदेड ग्रामीण पोलिसांनी गाडेगाव परिसरातील बेकायदेशीर तिर्रट जुगार अड्ड्यावर छापा टाकून तीन जणांना ताब्यात घेतले. या कारवाईत रोख रक्कम, मोबाईल फोन, मोटारसायकली तसेच जुगारासाठी वापरण्यात येणारे साहित्य असा एकूण ₹४,१४,९२० किमतीचा मुद्देमाल जप्त करण्यात आला. ही कारवाई १७ ऑगस्ट २०२६ रोजी करण्यात आली.

नांदेड ग्रामीण पोलीस ठाण्याच्या पथकाला गाडेगाव शिवारातील एका मोकळ्या जागेत काही इसम बेकायदेशीररीत्या ‘तिर्रट’ नावाचा जुगार खेळत असल्याची गोपनीय माहिती मिळाली होती. या माहितीच्या आधारे पोलिसांनी संबंधित ठिकाणी छापा टाकला. कारवाईदरम्यान ओमकार ज्ञानोबा कांबळे (वय २७), शिवहार उद्धव उबाळे (वय १९) आणि महेश शिवानंद उबाळे (वय १८) हे तिघे जुगार खेळताना आढळून आल्याचे पोलिसांनी नमूद केले आहे. तिघेही गाडेगाव, नांदेड येथील रहिवासी असून मजुरी व्यवसाय करतात.

पंचांसमक्ष करण्यात आलेल्या कारवाईत विविध कंपन्यांचे मोबाईल फोन, तीन मोटारसायकली, रोख रक्कम आणि बदक छाप पत्ते असा मुद्देमाल पोलिसांनी ताब्यात घेतला. जप्त करण्यात आलेल्या वाहनांमध्ये MH-26-CD-8311, MH-26-BN-5892, MH-26-S-9690 आणि MH-26-CF-9560 अशा क्रमांकांचा उल्लेख प्रेस नोटमध्ये आहे. वाहनांची अंदाजे किंमत ₹३.६० लाख, तर रोख रक्कम ₹१,९२० असल्याचे नमूद करण्यात आले आहे.
या प्रकरणी नांदेड ग्रामीण पोलीस ठाण्यात गुन्हा रजिस्टर क्रमांक ९९१/२०२६ नोंद करण्यात आला असून, महाराष्ट्र जुगार प्रतिबंधक कायद्यान्वये कलम १२(अ) अंतर्गत कारवाई करण्यात आली आहे.

पोलीस अधीक्षक डॉ. नीलाभ रोहन यांच्या मार्गदर्शनाखाली  निरीक्षक ओमकांत चिंचोळकर,पोलीस अंमलदार शंकर माळगे,मुपडे,शेख आसिफ,कांबळे यांनी  कारवाई केली आहे.  नांदेड जिल्ह्यात अवैध जुगार, मटका आणि इतर बेकायदेशीर धंद्यांविरोधात पोलिसांकडून सातत्याने कारवाई सुरू असल्याचे प्रेस नोटमध्ये नमूद करण्यात आले आहे. दरम्यान, अशा बेकायदेशीर हालचालींची माहिती नागरिकांनी पोलिसांना देऊन सहकार्य करावे, असे आवाहन नांदेड जिल्हा पोलिसांकडून करण्यात आले आहे.

Kanthak Suryatal