गोदावरी पात्रातील अवैध रेती उत्खननावर नांदेड ग्रामीण पोलिसांची कारवाई

पोलीस अधीक्षक डॉ. नीलाभ रोहन यांच्या मार्गदर्शनाखाली सुरू असलेल्या विशेष मोहिमेदरम्यान पोलीस निरीक्षक ओमकांत चिंचोलकर यांच्या पथकाला मौजे वाहेगाव येथील गोदावरी नदीपात्रात अवैध रेती उत्खनन सुरू असल्याची गोपनीय माहिती मिळाली. त्यानुसार छापा टाकण्यात आला. पोलिसांची चाहूल लागताच काही आरोपी घटनास्थळावरून फरार झाले.

कारवाईदरम्यान दोन हायवा (एमएच-२६ सीव्ही-२९८२ व एमएच-०८ डब्ल्यू-८३२९), दोन लोखंडी बोटी, सात इंजिने, चाळीस तराफे व रेती असा एकूण ₹१,७५,५०,००० किमतीचा मुद्देमाल जप्त करण्यात आला.

या प्रकरणी किरण साहेबराव भुरे (रा. बोरगाव तेलंग) व अर्जुन बालाजी पवार (रा. देवणेवाडी तांडा, ता. लोहा) यांच्यासह इतर चार फरार आरोपींविरुद्ध नांदेड ग्रामीण पोलीस ठाण्यात भारतीय न्याय संहिता, महाराष्ट्र जमीन महसूल अधिनियम तसेच पर्यावरण संरक्षण अधिनियमांतर्गत गुन्हा दाखल करण्यात आला असून पुढील तपास सुरू आहे.

ही कारवाई पोलीस निरीक्षक ओमकांत चिंचोलकर यांच्या नेतृत्वाखाली उपनिरीक्षक, अधिकारी व कर्मचाऱ्यांच्या पथकाने यशस्वीरीत्या पार पाडली. अवैध रेती उत्खनन, वाहतूक आणि पर्यावरणाला हानी पोहोचविणाऱ्या बेकायदेशीर कृत्यांविरुद्ध कठोर कारवाई यापुढेही सुरूच राहणार असल्याचा इशारा नांदेड जिल्हा पोलिसांनी दिला असून नागरिकांनी अशा प्रकारची माहिती तातडीने पोलिसांना देण्याचे आवाहन करण्यात आले आहे.