नांदेड (प्रतिनिधी)- जिल्ह्यात सुरू असलेल्या ‘ऑपरेशन क्रॅक डाऊन’ अंतर्गत नांदेड ग्रामीण पोलिसांनी गोदावरी नदीपात्रातून अवैधरीत्या रेतीचा उपसा करून चोरीची विक्री करणाऱ्या इसमांवर धडक कारवाई करत तब्बल 24 लाख 25 हजार रुपयांचा मुद्देमाल जप्त केला आहे.
पोलीस उप अधीक्षक प्रशांत शिंदे यांच्या मार्गदर्शनाखाली ही कारवाई करण्यात आली. नांदेड ग्रामीण पोलीस ठाण्याच्या हद्दीतील माळाकोळी शिवारातील गोदावरी नदीकिनारी अवैध रेती उपसा सुरू असल्याची गोपनीय माहिती पोलिसांना मिळाली होती. त्यानुसार पोलिसांनी घटनास्थळी छापा टाकला.
पोलिसांची चाहूल लागताच दोन अनोळखी इसम घटनास्थळावरून पळून गेले. मात्र, घटनास्थळी करण्यात आलेल्या तपासात 20 तराफे, त्यावरील 40 ब्रास रेती, रेती उपशासाठी वापरण्यात येणारी 4 इंजिने आणि 5 ब्रास रेती असा एकूण 24 लाख 25 हजार रुपयांचा मुद्देमाल जप्त करण्यात आला. या प्रकरणी नांदेड ग्रामीण पोलीस ठाण्यात गुन्हा क्रमांक 734/2026 अन्वये विविध कलमांखाली गुन्हा दाखल करण्यात आला आहे. आरोपींचा शोध सुरू असून पुढील तपास पोलीस करीत आहेत. उपविभागीय पोलीस अधिकारी प्रशांत महेंद्रे यांच्या मार्गदर्शनाखाली करण्यात आली. पोलीस निरीक्षक ओमकांत चिचोलकर, पोलीस उपनिरीक्षक व्यंकट कुसमे तसेच पोलीस अंमलदारांच्या पथकाने ही यशस्वी कारवाई पार पाडली. अवैध रेती उत्खनन व वाहतुकीविरोधात पोलिसांनी सुरू केलेल्या या मोहिमेमुळे रेती माफियांमध्ये खळबळ उडाली असून अशा कारवाया यापुढेही सुरू राहणार असल्याचा इशारा पोलिस प्रशासनाने दिला आहे.
