नांदेडमध्ये १४ वर्षीय प्रणव मेंडके बेपत्ता ; शोध घेण्यासाठी पोलिसांचे आवाहन

पोलिसांनी दिलेल्या माहितीनुसार प्रणव मेंडके हा सोमवार ५ ऑक्टोबर रोजी पहाटे सुमारे ४.२० वाजण्याच्या सुमारास घरातून निघून गेला. त्यानंतर तो घरी परतला नसल्याचे समोर आले आहे. नातेवाइकांनी त्याचा विविध ठिकाणी शोध घेतला; मात्र तो सापडला नसल्याने अखेर पोलिसांकडे तक्रार करण्यात आली. प्रणव हा मूळचा भोकर तालुक्यातील आमदरी वाडी येथील रहिवासी असून, सध्या तो नांदेड शहरातील छत्रपती चौक परिसरातील मोरेश्वर प्लाझा, प्लॉट क्रमांक ३०१ येथे राहत होता.

प्रणवची उंची सुमारे पाच फूट असून, रंग सावळा आणि शरीरबांधा सडपातळ आहे. त्याचा चेहरा लांबट असून, बेपत्ता झाला त्यावेळी त्याने ग्रे रंगाचा हाफ टी-शर्ट, हिरवट रंगाची नाइट पँट परिधान केली होती. तसेच त्याच्या तोंडाला लाल रंगाचा मास्क सदृश बांधलेले कापड आणि पायात सॅन्डल होते. त्याला चहा पिण्याची सवय व मराठी, हिंदी, इंग्रजी भाषा बोलता येत असल्याची माहिती पोलिसांच्या शोधपत्रिकेत नमूद करण्यात आली आहे.

बेपत्ता प्रणव मेंडके याच्याबाबत कोणाला काही माहिती मिळाल्यास त्यांनी तात्काळ भाग्यनगर पोलीस ठाण्याशी संपर्क साधावा असे आवाहन पोलीस निरीक्षक संतोष तांबे यांनी केले आहे. संपर्क क्रमांक भाग्यनगर पोलीस ठाणे  ०२४६२-२६१३६४, पोलीस निरीक्षक संतोष तांबे ९८५०१८८१००, तपासीक अंमलदार आर. पी. जाधव : ९०४९३४३०९५ हा आहे. बेपत्ता मुलाचा शोध घेण्यासाठी नागरिकांनी सहकार्य करावे आणि त्याच्याबाबत कोणतीही माहिती मिळाल्यास वरील क्रमांकांवर त्वरित कळवावे, असे पोलिसांनी आवाहन केले आहे.