बाप एक नंबरी, बेटा दस नंबरी: रुकम्याचा डिजिटल वारसदार!
नांदेड (प्रतिनिधी) – नांदेडच्या सुप्रसिद्ध आणि अत्यंत पवित्र अशा पत्रकारिता वर्तुळात सध्या एकच चर्चा रंगली आहे. ही चर्चा आहे संस्कारांची, घराण्याच्या थोर परंपरेची, वारशाची आणि बापाच्या पावलावर पाऊल ठेवून थेट गोव्याच्या समुद्रकिनाऱ्यापर्यंत मारलेल्या दरोडेखोरीच्या उडीची! नांदेडच्या पत्रकारितेच्या पावन भूमीत रुकम्या डाकू हे नाव कुणाला माहिती नाही? स्वतःला महान पत्रकार समजणाऱ्या या माणसाने पत्रकारितेच्या नावाखाली अनेकांच्या अब्रूची लुटालूट केली, अनेकांची मुंडकी छाटणी केली आणि आपल्या लेखणीचा वापर केवळ ब्लॅकमेलिंग आणि खंडणी गोळा करण्यासाठी केला. हा ज्यांचा मूळ धर्म होता, त्या रुकम्या डाकूचा सुपुत्र तर बापाच्याही चार पावले पुढे गेला आहे. बाप जर गल्लीबोळातला डाकू असेल, तर पोरगा थेट आंतरराज्यीय स्तरावरचा डिजिटल दरोडेखोर निघाला! बाप एक नंबरी तर बेटा दस नंबरी आणि जैसा बाप वैसा बेटा या म्हणींचा जिवंत आणि चालता-बोलता पुरावा म्हणजे रुकम्याचा हा सुपुत्र.
गोव्याचे सायबर पोलीस काल नांदेडमध्ये अचानक दाखल झाले आणि त्यांनी स्थानिक पत्रकारिता क्षेत्राला एक जबरदस्त धक्का दिला. या धक्क्याने रुकम्या डाकूच्या महापराक्रमी मुलाचा बुरखा टराटरा फाडला आहे. वास्तविक पाहता, नाव राजा असले तरी या महाशयांची वागणूक अत्यंत फालतू दर्जाची, फालतूगिरीची आणि हलकटपणाची आहे. स्वतःला महान पत्रकाराचे थोर पिल्लू समजणाऱ्या या बहाद्दर पोराने गोव्यातील एका निरपराध व्यक्तीला तब्बल ४२ लाख ६० हजार रुपयांचा गंडा घातला. गंडवण्याची पद्धतही अगदी आधुनिक! डिजिटल युगाचा हा डिजिटल दरोडेखोर! थेट बनावट अटक वारंट दाखवून, व्हिडिओ कॉल करून समोरच्या माणसाला तुम्ही डिजिटल अरेस्ट आहात असा भयानक बनाव रचला आणि घाबरवून एकाच झटक्यात लाखो रुपयांची खंडणी लाटली. बापाने आयुष्यभर रस्त्यावर लोकांना घाबरवून आणि बदनामीच्या धमक्या देऊन जेवढी माया जमवली नसेल, तेवढी या पोराने एसी कॅबिनमध्ये बसून एका क्लिकवर लाटली. याला म्हणतात प्रगती आणि तंत्रज्ञानाचा योग्य वापर!
आता या संपूर्ण डिजिटल दरोड्यातील एक रंजक आणि तितकाच संतापजनक भाग म्हणजे नांदेडमधील तेजस नावाचा एक निष्पाप विद्यार्थी. या गरीब आणि साध्या पोराच्या बँक खात्यात थेट दहा लाख रुपये जमा झाले. गोव्यातून लाटलेल्या ४२ लाख ६० हजारांच्या मायाजालातील तब्बल दहा लाख रुपये तेजसच्या बँक खात्यावर ट्रान्सफर करण्यात आले. त्यातील ५० हजार रुपये अत्यंत हुशारीने रोख स्वरूपात काढले गेले आणि उर्वरित ९ लाख ५० हजार रुपयांचा धनादेश एका तिसऱ्याच संशयास्पद व्यक्तीला सोपवण्यात आला. गोवा पोलीस आता या तिसऱ्या भिडूचा आणि उर्वरित पैशांचा शोध घेत आहेत. पण तेजस या विद्यार्थ्याने जेव्हा पोलिसांसमोर पोपटासारखे सत्य बोलण्यास सुरुवात केली, तेव्हा या राजाच्या डोक्यावरचा सोन्याचा मुकुट गळून चिखलात पडला. तेजसने स्पष्ट केले की, तो स्वतः त्याचे बँक खाते कधीच वापरत नव्हता; त्याचे बँक खाते तर थेट रुकम्या डाकूचा सुपुत्रच चालवत होता आणि संपूर्ण आर्थिक व्यवहार नियंत्रित करत होता! विद्यार्थ्यांच्या बँक खात्याचा असा पद्धतशीर गैरवापर करून स्वतःच्या तिजोऱ्या भरणारा हा रुकम्याचा पोरगा किती खतरनाक, लबाड आणि कपटी आहे, हे आता नांदेडकरांसमोर स्पष्ट झाले आहे. अजून या खात्याचे संपूर्ण व्यवहार खोलवर तपासले, तर रुकम्या डाकू पेक्षा त्याचा सुपुत्र किती पट जास्त खतरनाक आहे, याचे अनेक काळे कारनामे समोर येतील, यात तिळमात्र शंका नाही.
काल रात्रीचा भाग्यनगर पोलीस ठाण्यातील देखावा तर अगदी ऐतिहासिक आणि मनोरंजक होता. गोवा पोलिसांनी जेव्हा तेजसला आणि रुकम्याच्या मुलाला पोलीस ठाण्यात आणले, तेव्हा नांदेडचा तो स्वघोषित डाकू रुकम्या आपल्या लाडक्या पोराचा बचाव करण्यासाठी आणि जुनी सवय असल्याप्रमाणे काहीतरी मांडवली करण्यासाठी तातडीने धावून आला. पोलीस ठाण्याच्या आवारात तो अत्यंत गडबडीत हेलपाटे मारत होता. पण पोलिसांचा कडक खाक्या आणि गुन्ह्याची गंभीरता पाहून या मांडवली सम्राटाची हवाच गुल झाली. जो स्वतःला मोठा पत्रकार समजून लोकांना धमकावायचा आणि शहरात ऐटीत फिरायचा, तो रुकम्या डाकू एका ऑटोमध्ये आपले तोंड लपवून घाबरलेल्या अवस्थेत बसला होता! विचार करा, ज्याने आयुष्यभर अनेकांच्या घरांची अब्रू वेशीवर टांगली, तो स्वतःच एका रिक्षात तोंड काळं करून, मान खाली घालून लपून बसला होता. मांडवली करायला गेलेल्या बापाची स्वतःचीच नाचक्की झाली आणि रिकाम्या हाताने तोंड लपवत पळ काढावा लागला!
सध्या साहेबांच्या सावलीत वातानुकूलित म्हणजेच एसी ऑफिसमध्ये बसून, गुटख्याची मोठी चिमूट तोंडात दाबून, स्वच्छ पांढऱ्याशुभ्र बेसिनला आपल्या थुंकीने लाल रंग देण्याची या राजाची जुनी आणि आवडती सवय आहे. दुसऱ्यांचे कष्टाचे पैसे खाऊन गब्बर झालेल्या आणि राजकीय साहेबांच्या नावावर हवेत उड्या मारणाऱ्या या पोराला आता गोव्याच्या कडक पोलीस कोठडीची वारी करावी लागणार आहे. गोवा पोलिसांनी न्यायालयाकडून तेजस या विद्यार्थ्याची प्रवास कोठडी मंजूर करून घेतली आहे आणि रुकम्याच्या मुलाला गोव्याच्या सायबर पोलीस ठाण्यात प्रत्यक्ष हजर राहण्यासाठी कडक नोटीस बजावली आहे. बापाची पापे आणि हलकट कृत्य पोराच्या पाठीशी आले की काय, अशी जोरदार चर्चा सध्या नांदेडच्या गल्लीबोळातील चहाच्या टपरीपासून ते मोठ्या पत्रकारांच्या वातानुकूलित केबिनपर्यंत रंगली आहे.
जसे कर्म कराल, तसेच फळ मिळणार या निसर्गाच्या नियमातून कुणाचीच सुटका होत नसते. बापाच्या हलकटपणाचा, फसवणुकीचा आणि दरोडेखोरीचा वारसा पोराने अगदी इमानेइतबारे पुढे चालवला. पण शेवटी कायदा हा कायद्याचे काम करतोच. पोरगा बापाचेच गुण आत्मसात करणार, हे तर उघड होते. आता गोवा पोलीस या दस नंबरी पोरावर कोणती कडक कारवाई करतात आणि गोव्यात त्याला कशा प्रकारे पोलीस खाक्या दाखवून पाहुणचार देतात, याकडे संपूर्ण नांदेड जिल्ह्याचे लक्ष लागले आहे. एसी ऑफिसमधील पांढरे बेसिन लाल करणाऱ्या या राजाची गोव्याच्या सायबर पोलीस कोठडीत कशी अवस्था होते, हे पाहणे येणाऱ्या काळात अत्यंत मनोरंजक ठरेल. रुकम्या कंपनीच्या डकैती एक्सप्रेसचा हा डिजिटल थांबा आता थेट तुरुंगाच्या काळ कोठडीत जाऊन संपणार, हे निश्चित!
