नांदेड जिल्ह्यात छत्रपती शिवाजी महाराज जयंती उत्साहात साजरी

नांदेड – हिंदवी स्वराज्याचे संस्थापक छत्रपती शिवाजी महाराज यांच्या जयंतीनिमित्त नांदेड जिल्ह्यात विविध ठिकाणी मोठ्या उत्साहात कार्यक्रमांचे आयोजन करण्यात आले. शहरासह तालुक्यांच्या ठिकाणी शिवजयंतीनिमित्त प्रभातफेरी, दुचाकी रॅली, व्याख्यानमाला, सांस्कृतिक कार्यक्रम तसेच शिवप्रतिमेचे पूजन करण्यात आले.
नांदेड शहरातील छत्रपती शिवाजी महाराज यांच्या पुतळ्यास पुष्पहार अर्पण करून अभिवादन करण्यात आले. यावेळी विविध सामाजिक संघटना, राजकीय पक्षांचे पदाधिकारी, शाळा–महाविद्यालयांचे विद्यार्थी व नागरिक मोठ्या संख्येने उपस्थित होते. ढोल-ताशांच्या गजरात आणि जयघोषात वातावरण शिवमय झाले होते.
जिल्ह्यातील देगलूर, भोकर, मुखेड, लोहा, कंधार आदी ठिकाणीही शिवजयंतीनिमित्त मिरवणुका काढण्यात आल्या. काही ठिकाणी रक्तदान शिबिर, स्वच्छता मोहिम तसेच गरजूंना अन्नधान्य वाटप अशा सामाजिक उपक्रमांचे आयोजन करण्यात आले. मान्यवरांनी आपल्या भाषणात शिवरायांच्या शौर्य, पराक्रम, न्यायनिष्ठा आणि स्वराज्य स्थापनेतील दूरदृष्टीचा उल्लेख केला. युवकांनी शिवरायांच्या विचारांचे अनुसरण करून समाजहितासाठी कार्य करण्याचे आवाहन करण्यात आले.पोलीस प्रशासनाकडून शहरात चोख बंदोबस्त ठेवण्यात आला होता. सर्व कार्यक्रम शांततेत आणि उत्साहपूर्ण वातावरणात पार पडले