नांदेड(प्रतिनिधी)- आज देवशयनी आषाढी एकादशीच्या निमित्ताने नांदेड शहरात भक्तीचा महापूर लोटला असून, पांडुरंग माऊलीच्या जयघोषाने अवघे शहर दुमदुमून गेले आहे. सकाळपासूनच शहरातील विविध विठ्ठल-रुक्मिणी मंदिरांमध्ये दर्शनासाठी भाविकांनी मोठी गर्दी केली होती.
मंदिरांमध्ये भाविकांची मांदियाळी नांदेडचे पंढरपूर म्हणून ओळखल्या जाणाऱ्या चौफाळा येथील पांडुरंग मंदिरात भाविकांची प्रचंड गर्दी पाहायला मिळाली. दर्शनासाठी येथे दिवसभर लांबच लांब रांगा लागल्या होत्या. याचप्रमाणे वजीराबादमधील पांडुरंग मंदिर, सराफा भागातील मंदिर आणि सोलापूर गल्लीतील मंदिरांमध्येही भाविकांनी दर्शनासाठी अलोट गर्दी केली होती.
भव्य मिरवणूक आणि भजन सोहळे आषाढी निमित्त वारकरी भक्तांनी भगवान पांडुरंग आणि माता रुखमाई यांची भव्य मिरवणूक काढली. वाजत-गाजत आणि अत्यंत उत्साहात ही मिरवणूक शहराच्या मुख्य भागांतून पार पडली. यासोबतच शहरातील विविध मंदिरांमध्ये भजन गायनाचे कार्यक्रम आयोजित करण्यात आले होते, ज्यामुळे संपूर्ण वातावरण भक्तिमय झाले होते.
प्रसाद वाटप आणि सोयी-सुविधा भक्तांच्या सोयीसाठी अनेक ठिकाणी आणि मंदिरांमध्ये प्रसादाची व्यवस्था करण्यात आली होती. ठिकठिकाणी सेवाभावी संस्था आणि भक्तांकडून फराळ व प्रसादाचे वाटप करण्यात येत होते.
एकूणच, आषाढी एकादशीच्या निमित्ताने नांदेड शहरात विठ्ठल भक्तांचा मोठा उत्साह दिसून आला आणि पांडुरंग माऊलीच्या गजराने अवघ्या नांदेड नगरीत पंढरीचे वातावरण निर्माण झाले होते.
