६० वर्षांचा बादशाह अन् गृहमंत्र्यांचा मुलगा: शाहरुख खानच्या जय शाह भाई ट्विटमागे नक्की कोणती हतबलता? एका ट्विटने उठवलेले वादळ बॉलिवूडचा किंग, प्रेक्षकांच्या मनावर अधिराज्य गाजवणारा बादशाह म्हणजेच शाहरुख खान सध्या एका वेगळ्याच कारणाने सोशल मीडियाच्या केंद्रस्थानी आला आहे. शाहरुख खान, सलमान खान आणि आमीर खान या तिघांनाही बॉलिवूडमधील सर्वात मोठे चेहरे मानले जाते. परंतु, शाहरुख खानचा स्टारडम आणि त्याचा ओरा हा इतर कलाकारांपेक्षा अधिक व्यापक, प्रदीर्घ आणि सर्व पिढ्यांच्या पसंतीस उतरणारा राहिला आहे. दिलीप कुमार आणि अमिताभ बच्चन यांच्यानंतर जागतिक स्तरावर भारतीय सिनेमाचा चेहरा म्हणून जर कोणाचे नाव घेतले जात असेल, तर ते शाहरुख खानचे आहे. अशा उत्तुंग व्यक्तिमत्त्वाने जेव्हा सोशल मीडियावर एक ट्विट केले, तेव्हा संपूर्ण देश आणि त्याचे लाखो चाहते अवाक झाले. आयसीसीच्या अध्यक्षपदी बिनविरोध निवड झालेल्या किंवा पुन्हा सूत्रे हाती घेतलेल्या अमित शाह यांचे सुपुत्र जय शाह यांना शाहरुख खानने ट्विटरवर शुभेच्छा दिल्या. शाहरुखने आपल्या ट्विटमध्ये लिहिले, कांग्रेचुलेशन जय शाह भाई! जय शाह यांच्या नेतृत्वाचे कौतुक करताना शाहरुखने पुढे नमूद केले की, तुमच्या नेतृत्त्वामुळे जागतिक क्रिकेटला एक नवी दिशा मिळाली आहे. २०२८ च्या ऑलिम्पिक स्पर्धेत क्रिकेटचा समावेश होणे हा एक अत्यंत महत्त्वाचा टप्पा ठरेल.यासोबतच शाहरुखने जय शाह यांना भरपूर प्रेम, मिठी आणि भविष्यातील सर्व यशस्वी वाटचालीसाठी आगाऊ शुभेच्छा दिल्या. परंतु, या एका ट्विटनंतर सोशल मीडियावर ज्या प्रकारची भयंकर ट्रोलिंग आणि टीकेची झोड उठली, त्याने संपूर्ण बॉलिवूड हादरून गेले आहे. काहे का किंग भाई?: वयाची तुलना आणि जय शाह भाई संबोधनाचा वाद शाहरुख खानने जय शाह यांच्यासाठी वापरलेला भाई हा शब्द आणि त्यांच्या कौतुकाचा वर्षाव नेटिझन्सच्या भलताच पचनी पडलेला नाही. सोशल मीडियावर लोकांनी थेट सवाल उपस्थित करण्यास सुरुवात केली आहे की, हा कसला किंग आहे भाई? या टीकेमागे एक मुख्य कारण म्हणजे वयाचे आणि प्रतिष्ठेचे गणित. अमित शाह आणि शाहरुख खान हे दोघेही साधारण ६० वर्षांचे समवयस्क आहेत. गृहमंत्री अमित शाह यांच्याच वयाचा असलेला, जागतिक स्तरावर अफाट लोकप्रियता असलेला ६० वर्षांचा शाहरुख खान अमित शाह यांच्या तरूण सुपुत्राला जय शाह भाई म्हणून का संबोधतो आहे? शाहरुख खानवर अशी कोणती मजबुरी आली आहे की त्याला इतके नमते घ्यावे लागत आहे? सोशल मीडियावर नेटकऱ्यांनी उपहासात्मक आणि बोचरे टोमणे मारण्यास सुरुवात केली. काही लोकांनी तर अत्यंत तीक्ष्ण कटाक्ष टाकत विचारले, त्या दिवशी आर्यन खानने क्रूझवर कोणाचा खून केला होता का, ज्यामुळे शाहरुख खानला जय शाह यांच्यापुढे अशा प्रकारे नमते घ्यावे लागत आहे आणि अशा शुभेच्छा द्याव्या लागत आहेत? या विधानांमधून लोकांच्या मनात असलेला संताप आणि शाहरुख खानच्या बदलेल्या भूमिकेबद्दलची निराशा स्पष्टपणे दिसून येते. रीड की हड्डी ते बूट लिकिंग : नेटकऱ्यांचा जळजळीत संताप सोशल मीडिया प्लॅटफॉर्मवर शाहरुख खानच्या या ट्विटवर आलेल्या प्रतिक्रिया केवळ साध्या कमेंट्स नव्हत्या, तर तो शाहरुखच्या विश्वासार्हतेवर घेतलेला संशय होता. कविश अजीज नावाच्या युजरने लिहिले की, हे गृहस्थ दुबईचे अधिकृत ब्रँड ॲम्बेसेडर आहेत, संपूर्ण जगात त्यांची तुतारी वाजते. परंतु, व्हॉट्सॲपवर पाठवलेले सरकारी ट्विट आज यांनाही कॉपी-पेस्ट करावे लागत आहे. हा संपूर्ण मसुदा वरून ‘बिग बॉस’ने पाठवला आहे आणि तोच शाहरुखने जसाच्या तसा चेपला आहे. केशव नावाच्या युजरने उद्विग्न होऊन विचारले, आता तरी थोडी पाठीचा कणा (रीड की हड्डी) दाखवा! स्वतःची उरलीसुरली विश्वासार्हता का संपवत आहात? आरजा यांनी अत्यंत बोचऱ्या शब्दांत टीका करताना लिहिले, इतकी अफाट प्रसिद्धी आणि यश मिळवूनही जर तुम्हाला देशाचे गृहमंत्री आणि त्यांच्या मुलाची अशी लाचारी करावी लागत असे, तर या स्टारडमचा काय उपयोग? आणखी एका युजरने शाहरुखला उद्देशून म्हटले, कम ऑन एसआरके! तुमची बॉलीवूडमधील ‘किंग’ ही प्रतिष्ठा जपा. तुम्ही चमचेगिरीचे किंग नाहीत. मला आज लाज वाटत आहे की मी तुमच्या चित्रपटांचा चाहता होतो. देशातील जनतेला तुमची लाज वाटत आहे. काहींनी तर शाहरुखचा हा प्रवास एका नायकाकडून ट्रेटर (विश्वासघातकी) कडे झाल्याचा गंभीर आरोप केला. एका युजरने लिहिले, जेव्हा एखादी व्यक्ती इतकी पराभूत आणि घाबरलेली असते की तिला राज्यकर्त्यांच्या समोर रेंगाळावे लागते, तेव्हा आपण फक्त तिच्याबद्दल सहानुभूती दाखवू शकतो. इतकेच नव्हे तर उद्या शाहरुख खान मनोज तिवारीलाही अशाच शुभेच्छा देईल, अशा स्वरूपाच्या उपरोधिक टिप्पण्याही सोशल मीडियावर व्हायरल झाल्या. दुटप्पीपणा, पान मसाला आणि कलाकार की व्यापारी ? शाहरुख खानच्या या ट्विटवर लोक इतके हैरान का होत आहेत, असा प्रश्न विचारत राजकीय आणि सामाजिक विश्लेषक यांनी प्रेक्षकांच्या दुटप्पीपणावर बोट ठेवले आहे. काही दिवसांपूर्वी शाहरुख खानने देशाचे गृहमंत्री अमित शाह यांना वाढदिवसाच्या शुभेच्छा दिल्या होत्या, तेव्हाही त्यांच्यावर टीका झाली होती. जेव्हा देशातील सर्व बडे कलाकार पंतप्रधान किंवा गृहमंत्र्यांना भेटण्यासाठी रांगेत उभे राहतात, तेव्हा त्यांनी गृहमंत्र्यांच्या मुलाला शुभेच्छा दिल्या तर त्यात आश्चर्य वाटण्यासारखे काय आहे? उद्या जर ते गृहमंत्र्यांच्या नातवंडांनाही शुभेच्छा देऊ लागले, तरी आश्चर्य वाटायला नको. येथे सर्वात मोठा प्रश्न प्रेक्षकांच्या मानसिकतेचा आहे. जेव्हा आपण एखाद्या अभिनेत्याला किंग किंवा बादशाह बनवतो, तेव्हा आपण हे विसरतो की हेच कलाकार काही लाखांच्या आणि कोटींच्या फायद्यासाठी ‘गुटखा’ आणि ‘पान मसाला’ यांची जाहित करतात. शाहरुख खानकडे, सलमान किंवा अमिताभ यांच्याकडे पैशांची काहीही कमतरता नाही. त्यांनी जर पान मसाल्याची जाहिरात केली नाही, तरी त्यांच्या संपत्तीत किंवा स्टारडममध्ये काहीही फरक पडणार नाही. तरीही ते नैतिकता बाजूला ठेवून अशा जाहिराती करतात. जेव्हा हेच स्टार्स ऑनलाईन पोकर किंवा जुगारासारख्या खेळांची जाहिरात करतात, तेव्हा प्रेक्षकांना किंवा चाहत्यांना त्रास होत नाही. परंतु, जेव्हा हे स्टार्स राजकीय नेत्यांसमोर झुकतात, तेव्हाच लोकांच्या भावना दुखावतात. वस्तुतः, एक सामान्य व्यावसायिक आणि एक कलाकार यांच्यात काहीही फरक उरलेला नाही. दोघेही पैशांसाठी आणि स्वतःच्या फायद्यासाठी काम करतात. प्रेक्षकांनी त्यांना समाजसुधारक मानण्याची चूक करू नये. बदललेला राजकीय पट: मनमोहन सिंगांचा काळ ते बुलेटप्रूफ युग शाहरुख खानच्या या ट्विटने एका जुन्या आणि नव्या काळातील फरकावर प्रकाश टाकला आहे. एक काळ असा होता जेव्हा देशाचे तत्कालीन पंतप्रधान डॉ. मनमोहन सिंग व्यासपीठावर बसलेले असायचे, समोर राहुल गांधींसारखे दिग्गज राजकीय नेते प्रेक्षक म्हणून बसलेले असायचे आणि मायक्रोफोन हातात घेऊन शाहरुख खान देशाच्या राजकीय नेत्यांना थेट प्रश्न विचारत असे आणि त्यांना सल्ले देत असे. तो एक वेगळा काळ होता जेव्हा जुही चावलासारख्या अभिनेत्री रुपयाच्या घसरणीची तुलना डॉलरशी करत उघडपणे जोक्स मारायच्या. अमिताभ बच्चन पेट्रोल आणि डिझेलच्या वाढत्या दरांवर सोशल मीडियावर भाष्य करायचे आणि सरकारला जाब विचारायचे. परंतु आजचा काळ पूर्णपणे बदलला आहे. आज परिस्थिती अशी आहे की, अमिताभ बच्चन यांना स्वतःच्या घराबाहेर पडताना किंवा चाहत्यांना भेटताना बुलेटप्रूफ काचांच्या मागे उभे राहावे लागते. त्यांना किंवा त्यांच्या कुटुंबाला धमक्या मिळत असतानाही ते उघडपणे काहीही बोलू शकत नाहीत. आजचा काळ असा आहे की, जेव्हा स्वतःच्या जीवाला किंवा कुटुंबाला धोका निर्माण होतो, तेव्हा मोठमोठे स्टार्सही मौन बाळगणे पसंत करतात. आजचे कलाकार पंतप्रधानांची मुलाखत घेताना तुम्ही आंबा कसा खाता? चमच्याने खाता की हाताने? असे रसमयी प्रश्न विचारण्यातच धन्यता मानतात. त्यामुळे शाहरुख खानने जर जय शाह यांना भाई म्हणून शुभेच्छा दिल्या, तर त्यात नवल वाटण्यासारखे काहीही नाही. स्वदेसचा पडद्यावरचा नायक आणि वास्तव: निष्कर्ष लोकांना शाहरुख खानच्या या वर्तनाने दुःख का होते? कारण शाहरुख खानसोबत देशातील एका संपूर्ण पिढीचे बालपण आणि तारुण्य जोडलेले आहे. ९० च्या दशकातील आणि २००० सालातील पिढीने शाहरुखचे चित्रपट पाहून प्रेम करायला शिकले, त्याचे संवाद आणि कपड्यांची स्टाईल कॉपी केली. यामुळेच प्रेक्षकांचे त्याच्याशी एक भावनिक नाते तयार झाले आहे. परंतु, वास्तवाचे भान ठेवणे आवश्यक आहे. शाहरुख खानच्या स्वतःच्या मुलाला (आर्यन खान) एका कथित ड्रग्ज प्रकरणात महिनाभर तुरुंगात राहावे लागले होते. त्या प्रकरणानंतर शाहरुख खान आणि त्याच्या कुटुंबावर काय बितले असेल, हे सर्वांनी पाहिले आहे. डर सबको लगता है, गला सबका सूखता है! संकटाच्या काळात स्वतःच्या मुलाचे आणि स्वतःच्या व्यावसायिक साम्राज्याचे रक्षण करण्यासाठी प्रत्येक व्यक्ती हतबल होते. चक दे इंडिया किंवा स्वदेस यांसारख्या चित्रपटांमध्ये देशभक्तीचा आणि समाजसुधारणेचा संदेश दिला म्हणजे तो अभिनेता खऱ्या आयुष्यातही क्रांतीकारी किंवा समाजसुधारक असेल, अशी अपेक्षा ठेवणे ही प्रेक्षकांचीच चूक आहे. पडद्यावरचा नायक हा केवळ संहिता वाचणारा एक कलाकार असतो. वास्तव जगात तो स्वतःचे हितसंबंध जपणारा एक सामान्य माणूस असतो. त्यामुळे शाहरुख खानच्या या ट्विटवर आश्चर्य व्यक्त करण्यापेक्षा, बॉलीवूड स्टार्सची खरी प्रतिमा ओळखणे हेच प्रेक्षकांसाठी अधिक हिताचे ठरेल. Kanthak Suryatal Post Views: 289 Facebook WhatsApp Telegram Twitter LinkedIn Snapchat Threads Post navigation अपर पोलीस महासंचालक मधुकर पांडेय यांचा तीन दिवसीय नांदेड जिल्हा पाहणी दौरा अशोकराव चव्हाणांसह चार आमदारांना उडविण्याचा कट होता?,खंडणीखोर मुंबईतून जेरबंद; ‘ते चार आमदार कोण?’ या प्रश्नाने नांदेडमध्ये खळबळ