नांदेड परिक्षेत्रात पहिल्या दिवशी 29 गुन्हे दाखल

अवैध व्यवसाय निर्मूलन मोहिम

 नांदेड(प्रतिनिधी)-पोलीस उपमहानिरीक्षक शहाजी उमाप यांनी, दिनांक 1 ते 31 जुलै, 2026 दरम्यान, नांदेड परिक्षेत्रात अवैध दारू, गुटखा, मटका, जुगार, अंमली पदार्थ,  घातक शस्त्रे इत्यादी विरोधी मोहिम राबविण्याचे निश्चित केले असून, याबाबतच्या सविस्तर सूचना, दिनांक 30 जून रोजी परिक्षेत्रातील सर्व अधिकाऱ्यांना निर्गमित करण्यात आल्या आहेत.

सदर मोहिमेच्या पहिल्या दिवशी नांदेड परिक्षेत्रात, गांजा विक्री, साठवणूक व वाहतूक करणाऱ्यांविरुद्ध एनडीपीएस कायद्याखाली (4) व्यक्तीं विरुध्द कारवाई करुन त्यांचेकडून 7,59,450/- रुपयांचा मुद्देमाल जप्त करण्यात आला आहे.  गुटखा विक्री करणाऱ्या एका इसमाकडून रुपये 1,13,400/- रुपये किंमतीचा गुटखा व इतर मुद्देमाल जप्त करण्यात आला आहे. महाराष्ट्र जुगार कायद्याअंतर्गत (7) इसमांविरुद्ध कारवाई करून त्यांचे विरुद्ध (4) गुन्हे दाखल करण्यात आले असून, त्यांच्याकडून 51,790/- रुपयांचा मुद्देमाल जप्त करण्यात आला आहे. तर अवैध दारू विक्री करणाऱ्या (18) आरोपींविरुद्ध (18) गुन्हे दाखल करून, त्यांच्याकडून 90,250/- रुपयांचा मुद्देमाल जप्त करण्यात आला आहे. सदर कारवाई सोबतच, शस्त्र अधिनियमान्वये (1) अग्निशस्त्र व कोटपा अन्वये (2), तर इतर अधिनियमाखाली मिळून, एकूण (29) कारवाया करण्यात आल्या असून, यात निष्पन्न झालेल्या आरोपीतांकडून 20,60,090/-  रुपयांचा मुद्देमाल जप्त करण्यात आला आहे.

 खबर  हेल्पलाइन ला वाढता प्रतिसाद : अवैध व्यवसायांची माहिती थेट पोलिसांना पोहोचविता यावी, या दृष्टिकोनातून, पोलीस उप महानिरीक्षक कार्यालयाने 91 50 100 100 हा मोबाईल क्रमांक असलेली ‘खबर’ नावाची हेल्पलाइन सुरू केली असून,  सदर हेल्पलाइन वरून नागरिक अवैध व्यवसायांची अचूक माहिती पोलीस उप महानिरीक्षक कार्यालयापर्यंत पोहोचवत आहेत.

नागरिकांनी आपल्या भागातील गुटखा, अंमली पदार्थ व इतर अवैध व्यवसायांची माहिती, सदर क्रमांकावर फोन करून अथवा व्हाट्सअप मेसेज द्वारे पाठवावी व आपल्या भागातील अवैध व्यवसायांना आळा घालण्यासाठी आपला सक्रिय सहभाग नोंदवावा, असे आवाहन नांदेड परिक्षेत्राचे पोलीस उप महानिरीक्षक शहाजी उमाप यांनी केले आहे.

Kanthak Suryatal