नांदेड (प्रतिनिधी) – राज्यात वाढत्या तापमानाच्या पार्श्वभूमीवर अति उष्णतेची शक्यता लक्षात घेऊन प्रशासनाने नागरिकांसाठी महत्त्वपूर्ण मार्गदर्शक सूचना जारी केल्या आहेत. एप्रिल–मे महिन्यात उष्णतेची लाट तीव्र होण्याची शक्यता असल्याने नागरिकांनी आवश्यक ती काळजी घेण्याचे आवाहन करण्यात आले आहे. प्रशासनाने दिलेल्या सूचनांनुसार, दुपारी १२ ते ४ या वेळेत शक्यतो घराबाहेर पडणे टाळावे. अत्यावश्यक काम असल्यास डोक्यावर टोपी, रुमाल किंवा छत्रीचा वापर करावा. शरीरात पाण्याची कमतरता होऊ नये यासाठी भरपूर पाणी, लिंबूपाणी, ताक, नारळपाणी यांसारखे द्रवपदार्थ घ्यावेत. लहान मुले, ज्येष्ठ नागरिक आणि गर्भवती महिलांनी विशेष काळजी घ्यावी, असेही नमूद करण्यात आले आहे. उष्माघाताची लक्षणे जसे की चक्कर येणे, उलट्या, ताप वाढणे किंवा अशक्तपणा जाणवल्यास त्वरित वैद्यकीय मदत घ्यावी. शेतकरी, बांधकाम कामगार आणि मैदानी काम करणाऱ्यांनी शक्यतो सकाळी लवकर किंवा सायंकाळी काम करावे, अशी सूचना देण्यात आली आहे. जनावरांनाही सावलीत ठेवून पुरेसे पाणी देण्याचे आवाहन करण्यात आले आहे. दरम्यान, जिल्हा प्रशासनाने आरोग्य यंत्रणा सतर्क ठेवण्याचे निर्देश दिले असून, आवश्यक औषधसाठा आणि उपचार सुविधा उपलब्ध ठेवण्यात आल्या आहेत. नागरिकांनी अफवांवर विश्वास न ठेवता अधिकृत सूचनांचे पालन करावे, असे आवाहन प्रशासनाने केले आहे. Kanthak Suryatal Post Views: 361 Facebook WhatsApp Telegram Twitter LinkedIn Snapchat Threads Post navigation दारू पार्टी ठरली जीवावर; मेव्हण्यांकडून भाऊजीची जंगलात हत्या;मारेकऱ्यांना पोलीस कोठडी घरफोडीच्या दोन घटना; लाखोंचा ऐवज लंपास, पोलिसांत गुन्हे दाखल
