नांदेड (प्रतिनिधी)- शहरातील एम जी एम कॉलेज नांदेड येथे अनेक वर्षे प्रामाणिकपणे सेवक म्हणून काम करणारे स्व. सुनील कुलकर्णी यांचे निधन ही अत्यंत वेदनादायक आणि मन हेलावून टाकणारी घटना ठरली आहे. आयुष्यभर कष्टाची कास धरत संस्थेची सेवा करणाऱ्या एका साध्या कर्मचाऱ्याला स्वतःच्या हक्काच्या पैशांसाठी इतका मानसिक संघर्ष करावा लागला आणि त्या अन्यायाच्या जखमा मनात बाळगत अखेर मृत्यूशी झुंज देताना त्यांनी प्राण सोडले, ही बाब समाजाच्या संवेदनांना हादरवून टाकणारी आहे. स्व. कुलकर्णी यांनी अनेक वर्षे निष्ठेने आणि प्रामाणिकपणे काम केले. मात्र न्याय मिळवण्यासाठी त्यांना सतत संघर्ष करावा लागला, असा आरोप कुटुंबीय आणि जवळच्या लोकांकडून व्यक्त केला जात आहे. मानसिक त्रास आणि अन्यायाच्या ओझ्याखाली एका कष्टकरी कर्मचाऱ्याचे आयुष्य संपुष्टात येणे ही केवळ एका कुटुंबाची शोकांतिका नाही, तर व्यवस्थेवर प्रश्नचिन्ह उभे करणारी घटना आहे. त्यांच्या अचानक झालेल्या निधनामुळे कुटुंबावर दुःखाचा प्रचंड डोंगर कोसळला आहे. घरातील आधारस्तंभ हरपल्याने त्यांच्या कुटुंबीयांची अवस्था अत्यंत हळहळजनक झाली आहे. एका प्रामाणिक कर्मचाऱ्याच्या अशा दुःखद अंतामुळे समाजातही तीव्र संताप आणि हळहळ व्यक्त होत आहे. या संपूर्ण प्रकरणाची निष्पक्ष, सखोल आणि पारदर्शक चौकशी होणे अत्यावश्यक आहे. संबंधित संस्था चालक आणि प्राचार्य यांच्या भूमिकेची तपासणी करून दोषींवर योग्य ती कायदेशीर कारवाई व्हावी, हीच समाजाची आणि सर्वसामान्य नागरिकांची ठाम अपेक्षा आहे. ईश्वर दिवंगत आत्म्यास शांती देवो आणि त्यांच्या कुटुंबीयांना हे अपरिमित दुःख सहन करण्याची शक्ती देवो, हीच भावपूर्ण प्रार्थना. स्व. सुनील कुलकर्णी यांना भावपूर्ण श्रद्धांजली. Kanthak Suryatal Post Views: 899 Facebook WhatsApp Telegram Twitter LinkedIn Snapchat Threads Post navigation १७० दिवस देशद्रोही… आणि अचानक निरपराध? सोनम वांगचुक प्रकरणाने सरकारला विचारलेले अस्वस्थ करणारे प्रश्न हिमायतनगर पोलीस ठाण्याच्या हद्दीतील जुगार अड्डा उपमहानिरीक्षक यांच्या पथकाने उध्वस्त केला
