अमेरिकेचे अध्यक्ष डोनाल्ड ट्रम्प यांनी इराण आणि इस्रायल यांच्यातील युद्धबंदीची घोषणा केली होती. मात्र काही वेळातच इस्रायलने हा करार भंग करून पुन्हा इराणवर हल्ला केल्याची माहिती समोर आली आहे. इराण सरकारने प्रसिद्ध केलेल्या माहितीनुसार, इस्रायलने दोन क्षेपणास्त्रे इराणवर डागली आहेत.
इस्रायलचा करारभंग करण्याचा इतिहास लक्षात घेता, ही घटना फारशी आश्चर्यजनक नाही. गाझा पट्ट्यातील युद्धबंदी संदर्भात इस्रायलने ७० पेक्षा अधिक वेळा करार तोडलेले आहेत. या नवीन हल्ल्याची माहिती अमेरिकेचे अध्यक्ष ट्रम्प यांच्यापर्यंत पोहोचली असून, ते या कृतीने संतप्त झाले आहेत.अर्थात, याचा अर्थ असा नाही की ट्रम्प इस्रायलवर थेट हल्ला करतील. मात्र, इस्रायलने इराणवर हल्ला करून अमेरिकेस अत्यंत कठीण स्थितीत आणले आहे. पत्रकारांनी ट्रम्प यांना युद्धविराम तोडल्याबाबत विचारले असता, त्यांनी कठोर आणि उद्धट भाषेत उत्तर दिले. त्यांनी सांगितले की, “मी इस्रायलचे नेते नेतन्याहू यांना स्पष्ट शब्दांत सांगितले आहे की त्यांनी त्यांच्या पायलट्सना त्वरित परत बोलावले पाहिजे. यानंतर जर आणखी एखादा हल्ला झाला, तर त्याचे गंभीर परिणाम भोगावे लागतील.”
इराण सरकारने असा दावा केला आहे की इस्रायलने त्यांच्या रडार प्रणालीवर थेट हल्ला केला आहे. यावरून इस्रायलचा उद्देश त्यांच्या सुरक्षा यंत्रणेला निष्क्रिय करणे हाच असल्याचे स्पष्ट होते. या प्रकारामुळे नेतन्याहू यांना अत्यंत अपमानजनक परिस्थितीचा सामना करावा लागला असून, त्यांनी रागाच्या भरातच इराणच्या रडार प्रणालीवर हल्ला केला असल्याचे संकेत मिळतात. इस्रायली रेडिओने या हल्ल्याची पुष्टी केली आहे.मध्यपूर्वेतील प्रख्यात वृत्तसंस्था ‘अल जझीरा’ने दिलेल्या अहवालानुसार, डोनाल्ड ट्रम्प यांनी इस्रायलला रोखण्यासाठी कठोर शब्दांत इशारा दिला आहे. मात्र नेतन्याहू यांचे म्हणणे आहे की, युद्धविराम सर्वप्रथम इराणनेच तोडला होता. यावरून ट्रम्प अधिक संतप्त झाले.
कतारचे अमीर आणि पंतप्रधानांनी इराणला शांतता राखण्यासाठी विनवण्या केल्या होत्या आणि त्यातूनच हा युद्धविराम साकार झाला होता, हे ही तितकेच सत्य आहे. ट्रम्प यांनी पत्रकार परिषदेत इस्रायलला स्पष्ट इशारा दिला आणि आपल्या सोशल मिडिया पोस्टमधूनही लिहिले, “तुम्ही बॉम्ब टाकू नका. जर तसे केले, तर त्याचे परिणाम अत्यंत घातक ठरतील. तुमचे पायलट परत बोलवा.”त्यांचे हे शब्द फक्त विनंती नव्हे, तर आदेश आहेत. कारण अमेरिकेत सध्या युद्धविरोधी जनमत वाढले आहे आणि ट्रम्प यांच्यावर देशांतर्गत दबाव आहे. इस्रायलचा युद्धविरामाबाबतचा पवित्रा केवळ एक नौटंकी असल्याचे अनेक पत्रकारांचे मत आहे आणि सध्याची घडामोड त्याचाच प्रत्यय देत आहे.
अमेरिकेनेही इराणचे सर्वोच्च नेते आयातुल्ला खोमेनी यांना संपवण्याचा विचार केला होता, आणि त्यांच्या जागी स्वतःच्या मर्जीचा नेता बसवण्याचा डाव रचला होता. मात्र तो यशस्वी न झाल्याने ट्रम्प यांना माघार घ्यावी लागली. इस्रायल मात्र अजूनही हल्ले सुरू ठेवून आहे, यावरून या सर्वामागे एक कट असल्याचा संशय बळावतो.खोमेनी यांची सुरक्षा व्यवस्था अत्यंत कडक असून, ती कोणत्याही इलेक्ट्रॉनिक साधनांवर आधारित नाही. त्यामुळे त्यांना लक्ष्य करणे किंवा संपवणे हे अत्यंत कठीण आहे. ते कुठे आहेत, याबद्दल कोणतीही ठोस माहिती नसते आणि ते जगापुढे फक्त आपल्या प्रतिनिधींमार्फतच संवाद साधतात.इस्रायलने रडार प्रणालीवर केलेला हल्ला हा त्यांच्या सुरक्षेचे रक्षण करणाऱ्या यंत्रणेला निष्क्रिय करून, थेट खोमेनी यांच्यावर हल्ला करण्याच्या कटाचा भाग असू शकतो, अशीही शक्यता वर्तवली जात आहे.
