२०२४ च्या  लोकसभा निवडणुकीचे मानधन पोलिसाना २०२६ मध्ये 

मुंबई (प्रतिनिधी) – सन २०२४ मध्ये पार पडलेल्या लोकसभा सार्वत्रिक निवडणुकीच्या काळात अत्यंत महत्त्वपूर्ण व जबाबदारीचे कर्तव्य बजावणाऱ्या राज्यातील पोलीस अधिकारी आणि अंमलदारांसाठी एक आनंदाची बातमी आहे. निवडणूक प्रक्रिया शांततेत पार पाडण्यासाठी अहोरात्र राबणाऱ्या ५,५०४ पोलीस अधिकारी, अंमलदार व मंत्रालयीन कर्मचाऱ्यांना पारिश्रमिक मानधन आणि अतिकालिक भत्ता मंजूर करण्यात आला असून, यासाठी २६ कोटी ८० लाख ७५ हजार ६२० रुपयांचा निधी मंजूर करण्यात आला आहे. गृह विभागाने ११ ऑगस्ट २०२६ रोजी याबाबतचा महत्त्वपूर्ण शासन निर्णय जारी केला आहे.

निवडणूक कक्षातील कामगिरीचा गौरव लोकसभा सार्वत्रिक निवडणूक-२०२४ चे कामकाज वेळेत पूर्ण करण्यासाठी पोलीस महासंचालक कार्यालयातील मध्यवर्ती निवडणूक कक्ष आणि राज्यातील ६३ पोलीस घटकांमधील निवडणूक कक्षांमध्ये ५,५०४ अधिकारी व कर्मचारी कार्यरत होते. निवडणूक अधिसूचना जारी झाल्यापासून म्हणजेच १६ मार्च २०२४ ते निवडणूक प्रक्रिया पूर्ण होईपर्यंत म्हणजेच ६ जून २०२४ पर्यंत या कर्मचाऱ्यांनी पूर्णवेळ निवडणूक कर्तव्य बजावले आहे. त्यांच्या या अथक परिश्रमाचा मोबदला म्हणून शासनाने हे मानधन मंजूर केले आहे.

मानधनाचे निकष आणि अटी: या मानधनाच्या वितरणासाठी शासनाने खालीलप्रमाणे महत्त्वाचे निकष निश्चित केले आहेत:

• राजपत्रित अधिकाऱ्यांना मूळ वेतनाइतके मानधन: निवडणूक कामाशी प्रत्यक्ष संबंधित असलेल्या राजपत्रित अधिकाऱ्यांना माहे एप्रिल २०२४ च्या मूळ वेतनाइतकी रक्कम मानधन म्हणून एकदाच दिली जाईल.
• अराजपत्रित कर्मचाऱ्यांना अतिकालिक भत्ता: अराजपत्रित कर्मचारी जसे की गट ब ते गट ड आणि वाहनचालक यांना त्यांनी केलेल्या अतिरिक्त कामासाठी अतिकालिक भत्ता मूळ वेतनाच्या प्रमाणात देय राहील. अतिकालिक भत्त्याची गणना करताना गट ब व गट क साठी ८.३० तास, वाहनचालकांसाठी ९.४५ तास आणि चतुर्थ श्रेणी कर्मचाऱ्यांसाठी ९ तासांचा दिवस गृहीत धरला जाईल.
• कमाल मर्यादा: मानधनाची किंवा अतिकालिक भत्त्याची एकूण रक्कम संबंधित कर्मचाऱ्याच्या एका महिन्याच्या मूळ वेतनापेक्षा अधिक असणार नाही आणि ती संपूर्ण निवडणूक प्रक्रियेसाठी एकदाच देय असेल.
• दुहेरी लाभ नाही: ज्या कर्मचाऱ्यांनी निवडणूक कामासाठी प्रवास किंवा दैनिक भत्ता घेतला असेल, त्यांना मानधन किंवा प्रवास भत्ता यांपैकी जो अधिक फायदेशीर असेल तो निवडण्याचा पर्याय असेल. दोन्ही लाभ एकाच वेळी घेता येणार नाहीत. तसेच कंत्राटी किंवा दैनिक तत्त्वावर नेमलेल्या कर्मचाऱ्यांना हा लाभ अनुज्ञेय असणार नाही.

अचूक वितरणाची संपूर्ण जबाबदारी घटक प्रमुखांवर पोलीस महासंचालक कार्यालयाकडून जारी केलेल्या परिपत्रकानुसार, राज्यातील सर्व संबंधित घटक प्रमुखांना आपापल्या घटकातील पोलीस अधिकारी व अंमलदारांचे मानधन वाटप करण्याचे आदेश दिले आहेत. मानधन अदा करण्यापूर्वी सक्षम प्राधिकाऱ्याने दिलेला नियुक्ती आदेश आणि हजेरीपटाची अचूक पडताळणी करण्याची जबाबदारी पोलीस आयुक्त व घटक प्रमुखांची असणार आहे. एकाच कामासाठी दोनदा आर्थिक लाभ दिला जाणार नाही, याची खातरजमा करण्याचे स्पष्ट निर्देश देण्यात आले आहेत. हा शासन निर्णय महाराष्ट्र शासनाच्या संकेतस्थळावर उपलब्ध असून त्याचा संगणक संकेतांक २०२६०८१११८२६२७३८२९ असा आहे.