नांदेडमध्ये जुगार अड्ड्यावर पोलिसांची धाड; ४१ जणांवर कारवाई, ११ लाखांचा मुद्देमाल जप्त

नांदेड (प्रतिनिधी) – नांदेड शहराजवळील कामठा गावात सुरू असलेल्या जुगार अड्ड्यावर पोलिसांच्या विशेष पथकाने धाड टाकत मोठी कारवाई केली आहे. या कारवाईत तब्बल ४१ जणांना ताब्यात घेण्यात आले असून सुमारे ११.४७ लाख रुपयांचा मुद्देमाल जप्त करण्यात आला आहे.

पोलीस उपमहानिरीक्षक शहाजी उमाप यांना ‘खबर’ हेल्पलाइनवरून मिळालेल्या माहितीनुसार ही कारवाई करण्यात आली. २७ मार्च रोजी गाडेगाव रोडवरील कामठा परिसरात जगनलाल देविलाल यादव यांच्या मालकीच्या जागेत असलेल्या टिनशेडमध्ये ‘पपलू’ नावाचा जुगार खेळ सुरू असल्याचे आढळले. पोलिसांनी छापा टाकून आरोपींकडून १,५०,९५० रुपये रोख, ३७ मोबाईल फोन आणि १२ मोटारसायकली असा एकूण ११,४७,९५० रुपयांचा मुद्देमाल जप्त केला. या प्रकरणी विमानतळ पोलीस ठाण्यात महाराष्ट्र जुगार कायद्यांतर्गत गुन्हा दाखल करण्यात आला असून पुढील तपास पोलीस उपनिरीक्षक संतोष जोंधळे यांच्याकडे सोपविण्यात आला आहे.

दरम्यान, उपलब्ध माहितीनुसार या ठिकाणी जुगार खेळण्याचे प्रशिक्षण दिले जात असल्याचेही समोर आले आहे. राज कला क्रिडा व सांस्कृतिक मंडळ या संस्थेमार्फत अशा प्रकारची प्रशिक्षण केंद्रे विविध ठिकाणी चालवली जात असल्याची माहिती असून यापूर्वी परभणी जिल्ह्यातही अशाच केंद्रांवर कारवाई करण्यात आली होती. नागरिकांनी आपल्या परिसरात अशा प्रकारचे जुगार अड्डे अथवा प्रशिक्षण केंद्र आढळल्यास त्वरित माहिती देण्याचे आवाहन पोलीस उपमहानिरीक्षक शहाजी उमाप यांनी केले आहे. या कारवाईत पोलीस उपनिरीक्षक पंकज इंगळे यांच्यासह पोलीस अंमलदार प्रदीप खानसोळे,कामाजी गवळी,गणेश धुमाळ,संजीव जिंकलवाड यांचा सहभाग होता.