फलटण शहरातील महिला डॉक्टरच्या आत्महत्येने शहरच नव्हे तर संपूर्ण जिल्हा हादरला आहे. या प्रकरणात दररोज नवनवीन खुलासे, नवे आरोप, नवे बचाव – असे भावनांचे ज्वार आता माध्यमांतून उफाळून येत आहेत.आता काही पत्रकारांनी थेट डॉक्टरचं नाव घेत, तिच्या वैयक्तिक आयुष्याच्या गोष्टी प्रसारित करण्यास सुरुवात केली आहे. “सत्याचा शोध की संवेदनांचा व्यापार?” हा प्रश्न सर्वत्र चर्चेत आहे.
आत्महत्येचे गूढ वाढवतंय ‘हॉटेल मधुदीप’
डॉक्टर ज्या प्रशांत बनकर यांच्या घरी राहत होत्या, त्या घरात झालेल्या वादानंतर त्यांनी 23 ऑक्टोबर रोजी फलटणमधील हॉटेल मधुदीप मध्ये चेक-इन केलं होतं.
दोन दिवसांची खोली बुक केल्यानंतर, दुसऱ्याच दिवशी दार आतून बंद राहिल्याने हॉटेल प्रशासनाने सायंकाळी दार उघडलं… आणि आत दिसली एक धक्कादायक दृश्य – डॉक्टरने आयुष्य संपवलं होतं!या घटनेनंतर शहरात कुजबुज “घरातून बाहेर पडल्यावर तिनं हॉटेलच का निवडलं?” असा सवाल प्रत्येकाच्या ओठांवर आहे.
गोपाळ मदने अटकेत, पण प्रश्न कायम
फलटण ग्रामीण पोलीस ठाण्यात कार्यरत असलेले पोलीस उपनिरीक्षक गोपाळ मदने हे सध्या अटकेत आहेत.गोपाळ मदने म्हणतात, “मला पोलीस खात्यावर विश्वास आहे, न्यायालयावर विश्वास आहे.”
परंतु याच व्यक्तीविषयी छेडछाड आणि गैरवर्तनाचे आरोप समोर येत असल्याने संशयाचे सावट अधिक गडद होतंय.
‘घर-मालकाचा वाद’ की ‘भावनिक वादळ’?
प्रशांत बनकर यांच्या घरातील वादानंतर डॉक्टरनी हॉटेलचा पर्याय निवडला होता, असं पोलिसांना प्राथमिक तपासातून समजलं आहे.
प्रशांत बनकरच्या बहिणींचं म्हणणं आहे की, “डॉक्टर खूप तणावात होत्या, आम्ही त्यांना कधीही घर सोडायला सांगितलं नव्हतं.”
पत्रकारांनी विचारलेल्या प्रश्नांवर त्या सतत म्हणत होत्या, “त्या डिस्टर्ब होत्या, टेन्शनमध्ये होत्या.”मात्र आता माध्यमांतून हे चित्र रंगवलं जात आहे की डॉक्टर “अस्वस्थ मनस्थितीत” होत्या आणि त्यामुळे त्यांचं व्यक्तिमत्त्वच संशयाच्या भोवऱ्यात ओढलं जात आहे.
मीडिया ट्रायल की न्यायाची मशाल?
पत्रकारांनी घेतलेल्या मुलाखतीतून असे सूचित होतं की प्रकरणात “भावनिक संबंधांचा नाजूक धागा” होता.परंतु न्यायालयीन चौकशीपूर्वी अशा तर्कवितर्कांच्या लाटेत सत्य बुडतंय की काय, असा सवाल डॉक्टरांच्या सहकाऱ्यांकडून उपस्थित होत आहे.
डॉक्टरचा चार पानांचा अर्ज – राजकीय सावटाचा उल्लेख
महिला डॉक्टरने आत्महत्येपूर्वी चार पानांचा अर्ज दिला होता, ज्यात पोलीस अधिकारी गोपाळ मदने आणि काही राजकीय हस्तक्षेपाचा उल्लेख आहे.या अर्जात खासदार रणजीत निंबाळकर यांचं नाव आल्याचं बोललं जातं, मात्र निंबाळकर यांनी स्पष्ट केलं आहे की, “माझा या प्रकरणाशी काहीही संबंध नाही. माझे सीडीआर तपासा.”
राजकीय आणि सामाजिक पातळीवर खळबळ
राहुल गांधी यांनी या घटनेला “व्यवस्थेचा बळी” असं संबोधलं आहे.डॉक्टरांची संघटना ‘मॅग्नो’ राज्यभर आंदोलन छेडण्याच्या तयारीत आहे.दरम्यान, डॉक्टरच्या हातावर लिहिलेला मजकूर तिचाच आहे का, यावर प्रश्नचिन्ह निर्माण झालं आहे.
सत्य कोणाचं? न्याय कोणाचा?
पोलिस अधीक्षक तुषार जोशी म्हणतात, “तपास निष्पक्ष होईल, कोणताही दबाव येऊ दिला जाणार नाही.”
पण समाजातला प्रश्न अजूनही अधांतरी आहे. “ही आत्महत्या होती का, की व्यवस्थेच्या थंड हातांनी घडवलेलं एक ‘नियोजित मौन’?”फलटणचा हा गूढ प्रकरण आता सत्य, सत्ते आणि संवेदना यांच्या त्रिकोणात अडकलेलं आहे. न्यायाचा सूर कोण काढेल, आणि आवाज कोण ऐकेल — हेच पुढील दिवस ठरवतील.
संबंधित लिखाण ….
हातावर लिहिलं; ‘तो पोलीस उपनिरीक्षक माझ्यावर अत्याचार करत होता’… आणि डॉक्टरने दिला जीव!
