7 आणि 8 मे रोजी जिल्ह्यात येलो अलर्ट

नांदेड(प्रतिनिधी)- दि.5 मे रोजी वादळी वाऱ्याने नांदेड जिल्ह्यात, नांदेड शहरात आणि आसपासच्या काही जिल्ह्यांमध्ये उठवलेल्या वावटळामुळे त्रास झाला असतांना 5 मे रोजी जिल्हा आपत्ती व्यवस्थापन प्राधिकरणाच्यावतीने देण्यात आलेल्या प्रसिध्दी पत्रकानुसार नांदेड जिल्ह्यात 7 आणि 8 मे रोजी येलो अलर्ट जारी करण्यात आला आहे.
जिल्हा आपत्ती व्यवस्थापन अधिकारी किशोर कुऱ्हे यांच्या स्वाक्षरीने प्रसिध्दीसाठी पाठविलेल्या पत्रकानुसार दि.7 आणि 8 मे रोजी नांदेड जिल्ह्यात तुरळक ठिकाणी 30 ते 40 किलो मिटर वेगाने वारे वाहतील, विजेच्या कडकडाटासह आणि ढगांच्या गडगडाटासह हलका ते मध्यस्वरुपाचा पाऊस पडण्याची शक्यता वर्तविण्यात आली आहे. या संदर्भाने जनतेने काळजी घेण्याची सुचना आपत्ती व्यवस्थापन प्राधिकरणाने केली आहे.
खाली नमुद केलेल्या बाबी करा…
विजेच्या गडगडाटासह पावसाची पुर्व कल्पना आल्यास घराबाहेर जाणे टाळा. जर मोकळ्या जागेत असाल आणि जवळपास कुठलाही सुरक्षीत इमारतीचा आसरा नसेल तर सखल जागेत गुडघ्यात डोके टाकून खाली बसा. आकाशात विजा चमकत असल्यास घरात किंवा सुरक्षीत ठिकाणी आश्रय घ्या. घराच्या बालकनी, गच्ची अथवा बाहेरी ओट्यावर थांबू नका. आपण घरात आहेत आणि घरातील विद्युत उपकरणे चालू असतील तर ती त्वरीत बंद करा. तारांचे कुंपन, वीजेचे खांब व इतर खोखंडी वस्तुंपासून दुर राहा. पाण्यात उभे असला तर तात्काळ पाण्याबाहेर या.
खाली नमुद केलेल्या बाबी करू नका…
आकाशात विजा चमकत असल्यास घरातील लॅंंड लाईन फोनचा वापर करू नका. शॉवर खाली अंघोळ करू नका, पाण्याची पाईपलाईन असल्यास तिला स्पर्श करू नका. तसेच विद्युत उपकरणांचा वापर करू नका. विजेच्या गडगडाटासह वादळी वारे चालू असतांना लोखंडी धातुच्या सहाय्याने उभारलेल्या तंबुमध्ये किंवा शेडमध्ये थांबू नका. उंच झाडाच्या खाली आसरा घेवू नका. धातुच्या उंच मनोऱ्याजवळ उभे राहु नका. जर आपण घरात असाल तर उघड्या दारातून, खिडकीतून वीज पडतांना पाहु नका. हे बाहेर थांबण्याइतकेच धोकादायक आहे.