शेख शमीम हत्या प्रकरण: वजीराबाद पोलिसांची मोठी कारवाई, आणखी पाच आरोपींना अटक; एकूण १० जण पोलिसांच्या ताब्यात

घटनेचा थरार आणि पार्श्वभूमी ही दुर्दैवी घटना २१ जून रोजी मध्यरात्री दोन वाजेच्या सुमारास वाघी रोड परिसरात घडली होती. शेख शमीम हे आपल्या मित्रासोबत बसलेले असताना हल्लेखोरांनी त्यांच्यावर अचानक हल्ला चढवला. हल्लेखोरांनी प्रथम पिस्तुलातून गोळ्या झाडल्या आणि त्यानंतर तलवार व खंजिराने शरीरावर असंख्य वार केले. या भीषण हल्ल्यात शेख शमीम यांचा जागीच मृत्यू झाला. या घटनेमुळे दर्गा परिसरात आणि शहरात भीतीचे वातावरण पसरले होते.

पोलिस तपास आणि नवीन अटक घटनेचे गांभीर्य ओळखून वजीराबाद पोलीस ठाण्यात गुन्हा रजिस्टर क्रमांक ३०२/२०२६ नुसार गुन्हा दाखल करण्यात आला. पोलीस उप अधीक्षक रामेश्वर व्यंजने यांच्या नेतृत्वाखाली तपासाची चक्रे वेगाने फिरवण्यात आली. पोलिसांनी २२ जूनच्या मध्यरात्री गुप्त माहितीच्या आधारे पाच जणांना ताब्यात घेतले. अटक करण्यात आलेल्या आरोपींची नावे खालीलप्रमाणे आहेत: अब्दुल तौखीर अब्दुल सगीर (वय २४) शेख सादिक शेख चांद पाशा (वय २६) शेख नजीर शेख रशीद (वय २७)  रियाल सलीम सय्यद कासिम, जुबेर खान अकबर खान(वय २१)

या पाचही जणांना २३ जून रोजी न्यायालयात हजर करण्यात आले, जिथे त्यांना २६ जूनपर्यंत पोलीस कोठडीत ठेवण्याचे आदेश देण्यात आले. यापूर्वी पोलिसांनी पाच जणांना अटक केली होती, ज्यात प्रत्यक्ष हल्ला करणाऱ्या चार जणांचा समावेश होता.

समाजात उपस्थित होणारे प्रश्न शमीम यांच्या हत्येनंतर आता त्यांचे कुटुंबीय उध्वस्त झाले आहेत. एका वादातून सुरू झालेल्या या रक्तरंजित खेळाने अखेर शमीम यांचा बळी घेतला आणि त्यांचे मारेकरी आता तुरुंगाच्या वाटेवर आहेत. मात्र, यातून नेमके काय साध्य झाले, असा प्रश्न सर्वसामान्य नागरिक विचारत आहेत. पोलीस सूत्रांच्या माहितीनुसार, या प्रकरणात अद्यापही काही आरोपी फरार असून पोलीस त्यांचा कसून शोध घेत आहेत. या प्रकरणाचा पुढील तपास पोलीस उप अधीक्षक रामेश्वर व्यंजने करत आहेत. आगामी काळात या हत्येमागील मुख्य सूत्रधार आणि नेमका हेतू अधिक स्पष्ट होण्याची शक्यता आहे.

संबंधित बातमी ……

मध्यरात्रीचा रक्तरंजित थरार; धार्मिक सेवकाच्या निर्घृण हत्येप्रकरणी पाच आरोपी चार दिवस पोलीस कोठडीत