नांदेड :- लोकअदालत ही एक संधी असून आपले प्रकरण तडजोडीने मिटवून घेण्याचा मनामध्ये संकल्प करुन या संधीचा लाभ घ्यावा असे आवाहन उपस्थित पक्षकारांना प्रमुख जिल्हा व सत्र न्यायाधीश एस.जी. वेदपाठक यांनी केले. राष्ट्रीय लोकअदालतीच्या उद्घाटन समारंभासाठी उपस्थित पक्षकारांना लोकअदालतीचे महत्व काय आहे याची जाणीवही त्यांनी करुन दिली.
महाराष्ट्र राज्य विधी सेवा प्राधिकरण मुंबई यांच्या निर्देशानुसार नांदेड जिल्हा विधी सेवा प्राधिकरणचे अध्यक्ष तथा प्रमुख जिल्हा न्यायाधीश सुनील वेदपाठक यांच्या अध्यक्षतेखाली जिल्हा व सत्र न्यायालय नांदेडच्या प्रांगणात शनिवार 10 मे 2025 रोजी सकाळी 10.30 वा. राष्ट्रीय लोकअदालतीचा उद्घाटन समारंभ पार पडला. या कार्यक्रमास सी.व्ही. मराठे जिल्हा न्यायाधीश-01, श्रीमती रा.म. शिंदे जिल्हा न्यायाधीश-02, जिल्हा विधी सेवा प्राधिकरण सचिव श्रीमती दलजीत कौर जज, रंजीत देशमुख, जिल्हा सरकारी वकील तसेच नांदेड येथील सर्व न्यायाधीश उपस्थित होते.
राष्ट्रीय लोकअदालतीचे आयोजन नांदेड व नांदेड जिल्ह्यातील प्रत्येक तालुका न्यायालये येथे 10 मे 2025 रोजी करण्यात आले होते. नांदेड जिल्ह्यात एकुण 2 हजार 699 प्रकरणे सामोपचाराने निकाली निघाली असून, रक्कम रू. 14,73,40,870/- (अक्षरी चौदा कोटी त्र्याहत्तर लक्ष चाळीस हजार आठशे सत्तर) इतक्या रकमेबाबत विविध प्रकरणांत तडजोड झाली. त्यामध्ये दिवाणी, फौजदारी, धनादेश अनादरीत झालेली प्रकरणे, बॅंक प्रकरणे, मोटार वाहन अपघात नुकसानभरपाई, भूसंपादन, लोहमार्ग गुन्हा कबुली प्रकरणे, ग्रामपंचायतीचे घरपट्टी व पाणीपट्टीचे प्रकरणे तसेच कौटुंबिक न्यायालय, कामगार न्यायालय व सहकार न्यायालय येथील प्रलंबीत प्रकरणांचा व नांदेड वाघाळा महानगर पालिका, पंचायत समिती व ग्रामपंचायतींचे वसुली प्रकरणे, विविध बॅंकांचे तसेच विद्युत प्रकरणे, दूरसंचार विभागाचे टेलिफोन, ट्रॅफिक चालन इत्यादींचे दाखलपूर्व प्रकरणांचा समावेश होता. तसेच पाच दिवस घेण्यात आलेल्या विषेश मोहिमेअतंर्गत 635 प्रकरणे निकाली काढण्यात आले आहे.
विशेष म्हणजे या लोकअदालतीमध्ये नांदेड जिल्ह्यातील पती-पत्नीचे कौटुंबिक वादाची एकूण 4 प्रकरणे आपसात तडजोडीने मिटविण्यात आली असून त्यापैकी 2 वैवाहिक दांपत्यांनी आपसातील वाद संपवून पुन्हा एकत्र येवून संसाराची सुरुवात करण्याचा निर्णय लोकअदालतीच्या माध्यमातून घेतला.
सदरील लोकअदालतीमध्ये जास्तीत जास्त प्रकरणे निकाली काढून लोकअदालत यशस्वी करण्याकरिता प्रमुख जिल्हा व सत्र न्यायाधीश नांदेड यांच्या मार्गदर्षनाखाली श्रीमती दलजीत कौर जज, सचिव जिल्हा विधी सेवा प्राधिकरण नांदेड, मुख्यालयातील व तालुकास्तरावरील सर्व जिल्हा न्यायाधीश, दिवाणी न्यायाधीश यांनी विषेश प्रयत्न केले.
जिल्हा विधी सेवा प्राधिकरणाचे सचिव श्रीमती दलजीत कौर जज यांनी या राष्ट्रीय लोकअदालतीमध्ये परिश्रम घेतलेल्या सर्व न्यायालयीन कर्मचारी वृंदांचे आणि प्रत्यक्ष अप्रत्यक्ष सहकार्य केलेल्या सर्वांचे आभार व्यक्त करुन यापुढेही अशाच सहकार्याची आपेक्षा व्यक्त केली.
