नांदेडच्या सिडकोत भरधाव हायवा पलटी; घराच्या भिंती कोसळल्या, पानपट्टीचा चुराडा

चालक गंभीर, क्लीनरही जखमी; पहाटे २.२० वाजताची घटना

नवीन नांदेड (प्रतिनिधी) –  शहरातील सिडको वसाहतीत भरधाव वेगाने जाणारा हायवा ट्रक पलटी झाल्याची भीषण घटना मंगळवारी पहाटे २ वाजून २० मिनिटांच्या सुमारास घडली. वसंतराव नाईक महाविद्यालयाच्या जुन्या इमारतीसमोरील मुख्य रस्त्यावर हा अपघात झाला. या अपघातात हायवा ट्रकचा चालक आणि क्लीनर जखमी झाले असून चालक गंभीर जखमी असल्याची माहिती आहे. दरम्यान, हायवाच्या जोरदार धडकेमुळे रस्त्यालगतच्या एका घराच्या दोन्ही भिंती कोसळल्या, तर घरासमोरील महेश डेली निड्स या पानपट्टीचा अक्षरशः चुराडा झाला आहे.

मिळालेल्या प्राथमिक माहितीनुसार, मंगळवारी पहाटेच्या सुमारास हा हायवा ट्रक भरधाव वेगाने सिडको परिसरातून जात होता. वसंतराव नाईक महाविद्यालयाच्या जुन्या इमारतीसमोरील मुख्य रस्त्यावर चालकाचे वाहनावरील नियंत्रण सुटल्याने हायवा ट्रक पलटी झाला. या दरम्यान ट्रकची जोरदार धडक रस्त्यालगत असलेल्या घराला आणि दुकानाला बसली. धडकेची तीव्रता एवढी भीषण होती की, घराच्या दोन्ही भिंती कोसळल्या, तर घरासमोर असलेल्या महेश डेली निड्स या पानपट्टीचे मोठ्या प्रमाणात नुकसान झाले. दुकानातील साहित्याचीही नासधूस झाली. या अपघातात हायवामधील चालक आणि क्लीनर जखमी झाले. चालकाला गंभीर दुखापत झाल्याचे समजते. अपघातानंतर परिसरात मोठा आवाज झाल्याने नागरिकांची धावपळ उडाली. पहाटेच्या वेळी घडलेल्या या घटनेमुळे परिसरात भीतीचे वातावरण निर्माण झाले. अपघातग्रस्त हायवा ट्रकचा क्रमांक स्पष्टपणे दिसत नसल्याने वाहनाची ओळख पटविण्यात अडचण येत आहे. या अपघातामुळे घराचे आणि पानपट्टीचे मोठे आर्थिक नुकसान झाले आहे. सुदैवाने ही घटना पहाटेच्या वेळी घडल्याने रस्त्यावर नागरिकांची वर्दळ कमी होती. या अपघाताची माहिती मिळताच संबंधित यंत्रणांकडून पुढील कार्यवाही अपेक्षित असून अपघाताचे नेमके कारण तपासानंतर स्पष्ट होणार आहे. भरवस्तीतून धोकादायक वेगाने धावणाऱ्या अवजड वाहनांवर नियंत्रण ठेवण्याची गरज या घटनेमुळे पुन्हा एकदा अधोरेखित झाली आहे.

Kanthak Suryatal