रेल्वे गाड्यांमध्ये व स्थानकांवर अनधिकृत विक्रेत्यांविरुद्ध 7 दिवसीय विशेष मोहिम, 56 अनधिकृत फेरी वाल्यांवर कार्यवाही

नांदेड (प्रतिनिधी)- विभागात रेल्वे  गाड्यांमध्ये व रेल्वे स्थानकांवर अनधिकृत विक्रेत्यांविरुद्ध राबविण्यात आलेली 7  दिवसीय विशेष मोहीम यशस्वीरित्या पूर्ण करण्यात आली आहे. ही मोहीम दिनांक 20.02.2026 ते 26.02.2026 दरम्यान दक्षिण मध्य रेल्वे च्या मार्गदर्शनाखाली राबविण्यात आली. प्रवाशांना सुरक्षित, स्वच्छ व नियमनबद्ध सेवा उपलब्ध करून देणे तसेच अनधिकृत विक्रेत्यांच्या समस्येला आळा घालणे हा या मोहिमेचा मुख्य उद्देश होता.
या मोहिमेदरम्यान नांदेड विभाग अंतर्गत विविध स्थानकांवर आणि गाड्यामध्ये  व्यापक तपासण्या करण्यात आल्या. वाणिज्य विभागाच्या अधिकाऱ्यांनी गाड्यांमध्ये तसेच स्थानकांवर सखोल तपासणी करून अनधिकृत विक्रेत्यांची ओळख पटविली तसेच अधिकृत परवाना धारक विक्रेत्यांकडून नियमांचे पालन होत आहे का याची खात्री केली. अधिकृत विक्रेत्यांनी वैध परवाना व ओळखपत्र दर्शविणे तसेच रेल्वेने निर्धारित केलेल्या नियमांचे पालन करणे यावर विशेष भर देण्यात आला.
सततच्या अंमलबजावणीमुळे या मोहिमेत एकूण 56 अनधिकृत विक्रीची प्रकरणे आढळून आली असून संबंधितांविरुद्ध रेल्वे कायद्यानुसार आवश्यक ती कायदेशीर कारवाई करण्यात आली आहे. योग्य त्या प्रकरणांमध्ये अनधिकृत विक्रेत्यांना पुढील कारवाईसाठी आरपीएफकडे सोपविण्यात आले. या मोहिमेदरम्यान एकूण ₹23,165 इतका दंड वसूल करण्यात आला असून रेल्वे परिसरात शिस्त व सुव्यवस्था राखण्याच्या विभागाच्या बांधिलकीचे हे द्योतक आहे.
अनधिकृत विक्री ही केवळ नियमनबद्ध केटरिंग व्यवस्थेवर परिणाम करत नाही, तर प्रवाशांच्या सुरक्षेशी, अन्नपदार्थांच्या स्वच्छतेशी आणि गाड्या व स्थानकांतील सुरक्षेशी संबंधित गंभीर प्रश्न निर्माण करते. या मोहिमेच्या यशस्वी अंमलबजावणीमुळे प्रवाशांच्या हितसंरक्षणासाठी विभागाची सक्रिय भूमिका अधोरेखित होते.
रेल्वे प्रशासन प्रवाशांना आवाहन करते की त्यांनी केवळ वैध परवाना व ओळखपत्र दर्शविणाऱ्या अधिकृत विक्रेत्यांकडूनच खाद्यपदार्थ व इतर वस्तू खरेदी कराव्यात. तसेच अनधिकृत विक्रेत्यांना  प्रोत्साहन देऊ नये व अशा कोणत्याही प्रकारची माहिती रेल्वे कर्मचाऱ्यांना किंवा रेल्वे हेल्पलाईन 139 वर कळवावी.
प्रवाशांना सुरक्षित, संरक्षित व आरामदायी प्रवासाचा अनुभव देण्यासाठी अशा विशेष मोहिमा भविष्यातही सातत्याने राबविण्यात येतील.