अत्यंत कर्तबगार नेता  -कमलकिशोर कदम

नांदेड (प्रतिनिधी)- महाराष्ट्र राज्याच्या विकासामध्ये राज्याचे उपमुख्यमंत्री अजितदादा पवार यांचे मोठे योगदान आहे. त्यांचे अपघाती निधन होणे ही मनाला चटक लावणारी बाब आहे. अजित पवार हे जे बोलत होते करून दाखवित होते. त्यांच्या शब्दावर विश्‍वास ठेवावा असे ते नेते होते. त्यांच्या अकाली जाण्यामुळे महाराष्ट्राला मोठा धक्का बसला आहे. मागील 10 वर्षापासून मी त्यांच्या संपर्कात होतो त्यांचे आणि माझे अत्यंत जिव्हाळ्याचे नाते होते. सकाळी 7 वाजता उठून हा नेता रात्री 12 ते 1 वाजेपर्यंत कार्यकर्त्यांची कामे करायचा. त्यांनी महाराष्ट्राचे मुख्यमंत्री व्हावेत असे मला वाटत होते परंतू त्यांना ती संधी मिळाली नाही. त्यांच्या कार्यकाळामध्ये त्यांनी जनसामान्यांसाठी कार्य करून त्यांच्या कार्यशैलीचा वेगळा ठसा उमटविला आहे. त्यांच्या आत्म्यास ईश्‍वर शांती देवो तसेच पवार कुटूंबाला या संकटातून सावरण्याची ताकद ईश्‍वराने द्यावी असा शोकसंदेश राष्ट्रवादी काँग्रेस पार्टी शरद पवार पक्षाचे नेते तथा माजी मंत्री कमलकिशोर कदम यांनी व्यक्त केला.