भोकर येथील तलाठी साहेबराव टोमके यांच्याविरुद्ध लाचलुचपत प्रतिबंधक विभागाची कारवाई भोकर (प्रतिनिधी) – पत्नीच्या नावे असलेली शेतजमीन स्वतःच्या नावे करून देण्यासाठी १२ हजार रुपयांची लाच मागून, त्यापैकी ५ हजार रुपये स्वीकारणाऱ्या भोकर तालुक्यातील चिदगिरी सज्जाचे तलाठी साहेबराव हैबती टोमके यांच्याविरुद्ध लाचलुचपत प्रतिबंधक विभागाने (एसीबी) गुरुवारी (दि. २२ ऑक्टोबर) सापळा रचून कारवाई केली. लाचेची रक्कम स्वीकारल्यानंतर संबंधित तलाठ्याला पथकाने ताब्यात घेतले. नेमके प्रकरण काय? तक्रारदार (वय ६० वर्षे) यांच्या पत्नीच्या नावे भोकर तालुक्यातील चिदगिरी येथील गट क्रमांक २९० मध्ये ८० आर शेतजमीन आहे. त्यांच्या पत्नीचे निधन झाल्यानंतर सदर शेतजमीन स्वतःच्या नावे करण्यासाठी तक्रारदार २१ ऑक्टोबर रोजी भोकर येथील तलाठी कार्यालयात तलाठी साहेबराव टोमके यांना भेटले होते. यावेळी वारसदारांचे ५०० रुपयांच्या बाँड पेपरवर संमतीपत्र घेण्यासोबतच १२ हजार रुपयांच्या लाचेची मागणी करण्यात आल्याची तक्रार संबंधितांनी लाचलुचपत प्रतिबंधक विभागाकडे केली. तडजोडीनंतर ५ हजार रुपये स्वीकारले तक्रारीच्या अनुषंगाने २२ ऑक्टोबर रोजी सायंकाळी साडेचार वाजण्याच्या सुमारास भोकर येथील तलाठी कार्यालयात लाच मागणीची पडताळणी करण्यात आली. यावेळी शेतजमीन तक्रारदाराच्या नावे करण्यासाठी १२ हजार रुपये मागितल्याचे निष्पन्न झाले. तडजोडीनंतर तत्काळ ५ हजार रुपये स्वीकारण्याचे, तर उर्वरित ७ हजार रुपये दोन दिवसांनंतर घेण्याचे ठरल्याचे अहवालात नमूद आहे. त्यानंतर सायंकाळी साडेपाच वाजण्याच्या सुमारास लाचलुचपत प्रतिबंधक विभागाच्या पथकाने सापळा रचला. यावेळी तलाठी साहेबराव टोमके यांनी तक्रारदाराकडून ५ हजार रुपये स्वीकारल्यानंतर पथकाने त्यांना ताब्यात घेतले. लाचलुचपत प्रतिबंधक कायद्यान्वये गुन्हा दाखल करण्याची प्रक्रिया या प्रकरणी भोकर पोलीस ठाणे, जिल्हा नांदेड येथे भ्रष्टाचार प्रतिबंधक अधिनियम, १९८८ च्या कलम ७ अन्वये गुन्हा दाखल करण्यात आला आहे. उपलब्ध अहवालानुसार, गुन्हा दाखल झाल्यानंतर आरोपीला अटक करण्याची प्रक्रिया करण्यात येणार आहे. या पथकाने केली कारवाई ही कारवाई पोलीस निरीक्षक प्रिती जाधव यांच्या नेतृत्वाखाली करण्यात आली. पर्यवेक्षक अधिकारी म्हणून पोलीस उपअधीक्षक राहुल तरकसे यांनी काम पाहिले. पथकामध्ये पोलीस हवालदार बालाजी मेकाले, अमोल टाक, विनय नुकलवार आणि चालक पोलीस हवालदार रमेश नामपल्ले यांचा समावेश होता.लाचलुचपत प्रतिबंधक विभागाचे पोलीस अधीक्षक श्रीकृष्ण कोकाटे, अपर पोलीस अधीक्षक डॉ. अश्विनी जगताप आणि पोलीस उपअधीक्षक राहुल तरकसे यांच्या मार्गदर्शनाखाली ही कारवाई करण्यात आली. लाच मागितल्यास तक्रार करण्याचे आवाहन शासकीय कामासाठी कोणत्याही लोकसेवकाने लाचेची मागणी केल्यास नागरिकांनी लाचलुचपत प्रतिबंधक विभागाशी संपर्क साधून तक्रार करावी, असे आवाहन विभागातर्फे करण्यात आले आहे. तक्रारीसाठी संपर्क : लाचलुचपत प्रतिबंधक विभाग, नांदेड : ०२४६२-२५३५१२ परिक्षेत्र कार्यालय, नांदेड : ०२४६२-२५५८११ भ्रष्टाचारविरोधी हेल्पलाइन : १०६४ ई-मेल : dysp.acbnanded@mahapolice.gov.in Kanthak Suryatal Post Views: 49 Facebook WhatsApp Telegram Twitter LinkedIn Snapchat Threads Post navigation दुर्गा विसर्जन मिरवणुकीत अंधाराचे साम्राज्य! वीज वितरण कंपनी झोपेत, पोलिसांवर सुरक्षेचा भार!!
