मतदारांच्या शंकांचे निरसन; जनजागृतीसाठी सामाजिक व धार्मिक प्रतिनिधींना आवाहन
नांदेड – भारत निवडणूक आयोगाच्या निर्देशानुसार तथा जिल्हा निवडणूक अधिकारी व जिल्हाधिकारी राहुल कर्डिले यांच्या मार्गदर्शनाखाली 087 नांदेड दक्षिण विधानसभा मतदारसंघात ‘विशेष सखोल पुनर्निरिक्षण’ (Special Intensive Revision-SIR) कार्यक्रम प्रभावीपणे राबविण्यात येत आहे. या उपक्रमांतर्गत शनिवारी (दि. 11 जुलै) गुरुद्वारा परिसर तसेच दरबार मस्जिद, सराफा गल्ली येथे विशेष शिबिरांचे आयोजन करण्यात आले.
या शिबिरांना मतदार नोंदणी अधिकारी तथा उपविभागीय अधिकारी डॉ. सचिन खल्लाळ आणि सहायक मतदार नोंदणी अधिकारी तथा तहसीलदार संजय वारकड यांनी भेट देऊन कामकाजाची पाहणी केली. त्यांनी उपस्थित अधिकारी, कर्मचारी व बीएलओ यांना आवश्यक सूचना देत शिबिरांच्या माध्यमातून अधिकाधिक पात्र मतदारांपर्यंत पोहोचण्याचे निर्देश दिले.
गुरुद्वारा परिसरातील शिबिरात डॉ. सचिन खल्लाळ यांनी काही मतदारांचे Enumeration Form स्वतः बीएलओच्या ॲपद्वारे भरून घेतले. यावेळी उपस्थित सामाजिक कार्यकर्त्यांशी संवाद साधून त्यांनी SIR प्रक्रियेबाबत समाजामध्ये व्यापक जनजागृती करण्याचे आवाहन केले. शिबिराला नागरिकांचा उत्स्फूर्त प्रतिसाद लाभला.
यानंतर दरबार मस्जिद, सराफा गल्ली येथे भेटीदरम्यान इमाम साहेब, मस्जिद प्रतिनिधी आणि सामाजिक कार्यकर्त्यांशी बैठक घेण्यात आली. बैठकीत SIR प्रक्रियेसंदर्भातील विविध बाबींसह विशेषतः Anomaly विषयी मतदारांच्या मनात असलेल्या शंकांचे सविस्तर निरसन करण्यात आले. अनेक मतदारांना Anomaly संदर्भात संभ्रम असल्याचे निदर्शनास आल्याने त्याबाबत सविस्तर मार्गदर्शन करण्यात आले आणि सर्व प्रश्नांची समाधानकारक उत्तरे देण्यात आली.
यावेळी उपस्थितांना Enumeration Form वेळेत भरून देण्याचे आवाहन करण्यात आले. तसेच मस्जिदीच्या माध्यमातून SIR कार्यक्रमाबाबत आवश्यक जनजागृती करण्यात येईल, असे आश्वासन इमाम साहेबांनी दिले.
जिल्हा प्रशासनाने सर्व पात्र मतदारांनी SIR प्रक्रियेत सक्रिय सहभाग घेऊन आपले Enumeration Form वेळेत भरून द्यावेत तसेच परिसरातील इतर नागरिकांमध्येही याबाबत जनजागृती करावी, असे आवाहन केले आहे.
