नांदेड (प्रतिनिधी)- शहरातील वजीराबाद पोलीस ठाण्याच्या हद्दीत एका ४१ वर्षीय व्यक्तीची पूर्ववैमनस्यातून निर्घृण हत्या करण्यात आली आहे. हजरत शाह रहेमान दर्गा आणि दुल्हेशाह मस्जिदचे नायब मुतवल्ली शेख शमीम शेख इसाक यांची ही हत्या करण्यात आली असून, या घटनेने परिसरात मोठी खळबळ उडाली आहे.
घटनेचा तपशील: ही घटना रविवार, २१ जून २०२६ रोजी पहाटे २:०५ ते २:१० च्या सुमारास बरकतपुरा वाघी रोडवरील अबरार फंक्शन हॉल समोर घडली. मयत शमीम हे त्यांचे मित्र शिवशंकर पवार यांच्यासोबत गप्पा मारत बसले असताना, दोन दुचाकींवरून आलेल्या चार अज्ञात हल्खोरांनी त्यांच्यावर अचानक हल्ला केला. हल्लेखोरांनी प्रथम शमीम यांच्यावर पिस्तूलने गोळी झाडली आणि त्यानंतर तलवार व खंजीरने त्यांच्या पोटावर व डोक्यावर सपासप वार करून त्यांना गंभीर जखमी केले.
उपचारादरम्यान मृत्यू: गंभीर जखमी झालेल्या शमीम यांना तातडीने यशोसाई रुग्णालयात हलवण्यात आले होते, मात्र उपचारादरम्यान सकाळी ५ वाजता त्यांचा मृत्यू झाला.
हत्येमागचे कारण: मयताचे भाऊ आणि तक्रारदार शेख वसीम शेख इसाक यांनी दिलेल्या माहितीनुसार, दर्गा आणि मशिदीच्या व्यवस्थापनावरून आरोपींशी त्यांचा जुना वाद होता. सन २०२३ मध्ये आरोपींविरुद्ध दाखल केलेला गुन्हा मागे घेण्यासाठी आणि दर्ग्याचे नायब मुतवल्ली पद सोडण्यासाठी शमीम यांना वारंवार जीवे मारण्याच्या धमक्या दिल्या जात होत्या.
यांच्यावर गुन्हा दाखल: वजीराबाद पोलिसांनी या प्रकरणी खालील संशयितांविरुद्ध गुन्हा दाखल केला आहे: मिर्झा शब्बर बेग, मिर्झा कलंदर बेग,मिर्झा शब्बीर बेग आणि दोन अनोळखी आरोपी.
पोलीस कारवाई: या प्रकरणी वजीराबाद पोलिसांनी भारतीय न्याय संहिता २०२३ च्या कलम १०३(१), ३(५) आणि शस्त्र अधिनियम, १९५९ च्या विविध कलमान्वये गुन्हा क्रमांक ०३०२ नोंदवला आहे. पोलीस निरीक्षक अजित कुंभार यांच्या मार्गदर्शनाखाली पुढील तपास सुरू आहे.
घटना स्थळाच्या जागेचे दोन व्हिडीओ ज्यात हत्यारे दिसत आहेत..
संबंधित बातमी ….
नांदेड पुन्हा हादरले; शेख शमीम शेख इसाक यांच्या हत्येने शहरात खळबळ
दुचाकीवर आलेले मारेकरी हल्ला करून पळून जाताना दिसत आहेत असा व्हिडीओ ..
हा गुन्हा करतांना दुचाकीवर दिसणारेच आरोपी नव्हते तर खंडीभर आरोपी होते. असे सांगितले जात आहे. ते सर्व वेगवेळ्या पॉईंट्स वर उभे होते म्हणे. त्यातील सत्य काय हे शोधण्याचे काम पोलीस करतीलच.
