*कृषी-भूषण सूर्यकांतराव देशमुख झरीकर (परभणी) यांना जीवन साधना गौरव पुरस्कार*
नांदेड -स्वामी रामानंद तीर्थ मराठवाडा विद्यापीठातर्फे मराठवाडा मुक्ती संग्राम दिन व विद्यापीठाच्या वर्धापन दिनानिमित्त २०२३-२४ या वर्षासाठीचे पुरस्कार वितरण समारंभ दि. ३० जानेवारी रोजी दोन सत्रामध्ये आयोजित करण्यात आलेला आहे. २०२३-२४ या वर्षीचा जीवन साधना गौरव पुरस्कार झरी (परभणी) येथील सूर्यकांतराव देशमुख (कांतराव काका झरीकर) यांना जाहीर झाला आहे. या पुरस्काराचे वितरण ३० जानेवारी रोजी स. ११:०० वा. महाराष्ट्र राज्याच्या सहकार विभागाचे कॅबिनेट मंत्री मा.ना. बाळासाहेब पाटील यांच्या हस्ते होणार आहे. या कार्यक्रमाचे अध्यक्ष म्हणून विद्यापीठाचे कुलगुरू डॉ. मनोहर चासकर हे असणार आहेत. असे विद्यापीठाचे कुलसचिव डॉ. डी.डी. पवार यांनी कळविले आहे.
कांतराव काका झरीकर यांना महाराष्ट्र शासनाने कृषी-भूषण पुरस्काराने सन्मानित केले आहे. त्यांनी कृषी, जलसंधारण, कृषीपूरक उद्योग क्षेत्रात विविध प्रयोग करून समाजापुढे आदर्श निर्माण केला आहे. तसेच त्यांनी सामाजिक, जांभुळभेट संवर्धन, एक गाव-एक स्वच्छ सुंदर समशानभूमी चळवळीची पायाभरणीकरित सामाजिक योगदान दिलेले आहे. या त्यांच्या कार्याची दखल घेऊन विद्यापीठाने त्यांना जीवनसाधना गौरव पुरस्कार २०२३-२४ देण्याचे जाहीर केले आहे. याशिवाय दि. ३० जानेवारी रोजी पहिल्या सत्रात देण्यात येणारे पुरस्कार पुढीलप्रमाणे आहेत. उत्कृष्ट महाविद्यालय शहरी विभाग- लातूर येथील दयानंद फार्मसी महाविद्यालय, उत्कृष्ट शिक्षक- शहरी विभाग परभणी येथील शिवाजी महाविद्यालयातील प्रा. डॉ. रोहिदास नितोंडे. तरुण शिक्षक संशोधक पुरस्कार- महाविद्यालयातील शिक्षकांमधून लातूर येथील दयानंद फार्मसी महाविद्यालयाचे प्रा. डॉ. क्रांती सातपुते आणि विद्यापीठ परिसर संकुलामधून संगणकशास्त्र संकुलातील प्रा. डॉ. अर्चना साबळे यांना जाहीर झालेले आहेत. या सर्वांना मान्यवरांच्या हस्ते पुरस्काराचे वितरण होणार आहे. असे विद्यापीठाचे कुलसचिव डॉ. डी.डी. पवार यांनी कळविले आहे.
दि. ३० जानेवारी रोजी दुपारच्या सत्रात (दु.०२:३० वा.) महाराष्ट्र राज्याच्या सार्वजनिक आरोग्य व कुटुंब कल्याण, पाणीपुरवठा आणि स्वच्छता, ऊर्जा, महिला व बालविकास आणि सार्वजनिक बांधकाम या विभागाच्या राज्यमंत्री तथा परभणीच्या पालकमंत्री मा.ना. श्रीमती मेघनाताई साकोरे बोर्डीकर यांच्या हस्ते पुरस्कारांचे वितरण होणार आहे. या कार्यक्रमाचे अध्यक्ष म्हणून विद्यापीठाचे कुलगुरू डॉ. मनोहर चासकर राहणार आहेत.
या सत्रात परीक्षा विभागामार्फत गुणवंत विद्यार्थ्यांना दिल्या जाणाऱ्या विविध पुरस्कारांचे वितरण होणार आहे. तसेच विद्यार्थी विकास विभागातर्फे दिले जाणारे विविध पुरस्कार, क्रीडा विभागामार्फत दिले जाणारे विविध पुरस्कार, राष्ट्रीय सेवा योजना विभागामार्फत दिले विविध पुरस्कार या सत्रात देण्यात येणार आहेत. याशिवाय विद्यापीठातील कर्मचाऱ्यांच्या गुणवंत पाल्यांचा गुणगौरव या समारंभामध्ये होणार आहे. असे विद्यापीठाचे कुलसचिव डॉ. डी.डी. पवार यांनी कळविले आहे.
