वसुलीच्या नावाखाली गुंडगिरी खपवून घेणार नाही; सावकारांना पोलीस उप महानिरीक्षकांचा सज्जड दम

नांदेड (प्रतिनिधी) – खाजगी सावकाराच्या कर्जाच्या वसुलीसाठी एका शेतकऱ्याचे अपहरण करून त्याला दोन दिवस डांबून ठेवल्याचा आणि त्यानंतर त्याचा खून केल्याचा गंभीर प्रकार नांदेड शहरात उघडकीस आला आहे. या प्रकरणी मृत शेतकऱ्याच्या नातेवाइकांनी दिलेल्या तक्रारीवरून नांदेड शहरातील वजीराबाद पोलीस ठाण्यात खुनाचा गुन्हा नोंदवण्यात आला असून पोलीस सध्या या प्रकरणाचा सखोल तपास करत आहेत.

अवाजवी व्याजवसुली आणि छळ हा फौजदारी अपराध:
या घटनेची गांभीर्याने दखल घेत पोलीस उप महानिरीक्षक शहाजी उमाप यांनी स्पष्ट केले की, खाजगी सावकार किंवा कोणत्याही वित्तसंस्थेने पुरवलेल्या कर्जाच्या वसुलीसाठी अतिरिक्त व्याजदराची मागणी करणे, अथवा या वसुलीसाठी शेतकऱ्यांना धमकावणे, मारहाण करणे, पळून नेणे किंवा डांबून ठेवणे हे सर्व प्रकार कायद्यानुसार गंभीर स्वरूपाचे फौजदारी अपराध आहेत.

नागरिकांना निर्भीडपणे तक्रार करण्याचे आवाहन:
पोलीस प्रशासनाकडून नागरिकांना आवाहन करण्यात येत आहे की, जर कोणाच्याही बाबतीत अशा प्रकारचा खाजगी सावकारीचा त्रास, धमक्या किंवा बेकायदेशीर वसुलीचा प्रकार घडला असेल किंवा घडत असेल, तर त्यांनी अजिबात न घाबरता तात्काळ नजीकच्या पोलीस ठाण्यात जाऊन आपली तक्रार नोंदवावी.

कठोर कायदेशीर कारवाईची ग्वाही:
अशा प्रकारे बेकायदेशीर सावकारी करणाऱ्यांवर आणि वसुलीच्या नावाखाली गुंडगिरी करणाऱ्यांवर पोलीस प्रशासन अतिशय कठोर आणि सक्त कायदेशीर कारवाई करेल, अशी ठाम ग्वाही  पोलीस उप महानिरीक्षक शहाजी उमाप  यांनी दिली आहे.

पोलीस उप महानिरीक्षक शहाजी उमाप यांचे नांदेड,हिंगोली,परभणी आणि लातूर जिल्ह्यातील जनतेला आवाहन …

Kanthak Suryatal