सिंचन भवनाजवळ जीवघेणा निष्काळजीपणा? वर्दळीच्या रस्त्यालगत उघडा ट्रान्सफॉर्मर; दुर्घटनेची प्रशासन वाट पाहत आहे का?

सिंचन भवनाजवळ जीवघेणा निष्काळजीपणा? वर्दळीच्या रस्त्यालगत उघडा ट्रान्सफॉर्मर; दुर्घटनेची प्रशासन वाट पाहत आहे का?

नांदेड (प्रतिनिधी) –  नांदेड शहरातील वर्कशॉप कॉर्नर परिसरात, सिंचन भवनाच्या भिंतीलगत व जंगमवाडीकडे जाणाऱ्या अत्यंत वर्दळीच्या रस्त्यालगत, बॉबी बारसमोर असलेला महावितरणचा ट्रान्सफॉर्मर अत्यंत धोकादायक अवस्थेत उघडा पडलेला असल्याचे समोर आले आहे. ट्रान्सफॉर्मरच्या विद्युत नियंत्रण पेट्यांचे दरवाजे पूर्णपणे उघडे असून आत विद्युत यंत्रणा आणि वायरिंग उघड्यावर दिसत आहे. त्यामुळे कोणत्याही क्षणी गंभीर अपघात होण्याची भीती नागरिक व्यक्त करत आहेत.

विशेष म्हणजे, सदर ट्रान्सफॉर्मरपासून महावितरणचे पॉवर स्टेशन केवळ पायी चालत जाण्याच्या अंतरावर आहे. तसेच महावितरणचे अनेक अधिकारी व कर्मचारी याच मार्गाने दररोज ये-जा करतात. तरीही इतक्या धोकादायक अवस्थेकडे दुर्लक्ष होत असल्याने नागरिकांनी तीव्र संताप व्यक्त केला आहे.
स्थानिकांच्या म्हणण्यानुसार, हा रस्ता दिवसभर नागरिक, महिला, ज्येष्ठ नागरिक, दुचाकीस्वार तसेच शालेय विद्यार्थ्यांनी गजबजलेला असतो. अशा ठिकाणी उघड्या अवस्थेतील उच्चदाब विद्युत उपकरणामुळे कोणत्याही निष्पाप नागरिकाचा जीव धोक्यात येऊ शकतो. नागरिकांचा आरोप आहे की, यापूर्वीही परिसरात विद्युत धक्क्याच्या घटना घडल्या असून, तरीदेखील आवश्यक दुरुस्ती व सुरक्षेच्या उपाययोजना करण्यात आलेल्या नाहीत. मोठी दुर्घटना घडल्यानंतरच संबंधित अधिकारी जागे होणार का? असा संतप्त सवाल नागरिकांकडून उपस्थित केला जात आहे.

नागरिकांनी महावितरण प्रशासनाकडे तातडीने पुढील उपाययोजना करण्याची मागणी केली आहे:

* ट्रान्सफॉर्मर व विद्युत नियंत्रण पेट्या तात्काळ सुरक्षितपणे बंद कराव्यात.
* परिसरात संरक्षक कुंपण व धोक्याचे इशारा फलक लावावेत.
* संपूर्ण विद्युत यंत्रणेची तांत्रिक तपासणी करून दोष दूर करावेत.
* संबंधित अधिकाऱ्यांनी घटनास्थळी भेट देऊन नागरिकांच्या सुरक्षेची खात्री करावी.

नागरिकांच्या जीविताची जबाबदारी कोणाची? असा प्रश्न उपस्थित होत असून, संभाव्य दुर्घटना टाळण्यासाठी महावितरण प्रशासनाने तातडीने कारवाई करावी, अशी सर्वसामान्यांची मागणी आहे. अन्यथा भविष्यात घडणाऱ्या कोणत्याही जीवितहानीसाठी जबाबदार कोण, असा प्रश्न उपस्थित होऊ शकतो.