महात्मा फुले शॉपिंग कॉम्प्लेक्सच्या छतावर बिअर बार; महापालिकेच्या भूमिकेवर प्रश्न

नांदेड (प्रतिनिधी)-  शहरातील महापालिकेच्या महात्मा फुले शॉपिंग कॉम्प्लेक्सच्या इमारतीवर सुरू झालेल्या बिअर बारवरून आता नव्या वादाला तोंड फुटले आहे. समाजसुधारक, शेतकरी आणि बहुजन समाजाच्या हक्कांसाठी आयुष्यभर संघर्ष करणारे क्रांतिसूर्य महात्मा ज्योतिराव फुले यांच्या नावाने उभारलेल्या इमारतीत बिअर बार सुरू झाल्याने अनेक नागरिकांनी तीव्र नाराजी व्यक्त केली आहे.

नागरिकांच्या मते, महात्मा फुले हे महाराष्ट्रातील सर्वात मोठ्या समाजसुधारकांपैकी एक असून त्यांच्या विचारांचा सन्मान राखणे ही प्रत्येक सार्वजनिक संस्थेची जबाबदारी आहे. अशा महापुरुषांच्या नावाच्या इमारतीत मद्यविक्रीशी संबंधित व्यवसाय सुरू होणे हे त्यांच्या कार्याचा आणि नावाचा अवमान असल्याची भावना व्यक्त होत आहे.

माहितीनुसार, महापालिकेने महात्मा फुले शॉपिंग कॉम्प्लेक्सच्या बांधकामाला मंजुरी दिली, त्यावेळी या इमारतीत बिअर बार सुरू करण्यात येणार असल्याची कोणतीही अधिकृत घोषणा करण्यात आली नव्हती. तसेच इमारतीच्या सर्वात वरच्या छतावर स्वतंत्र बांधकाम करून Copper and Coal Bar सुरू करण्यात आल्याचे सांगितले जात आहे. त्यामुळे या बांधकामास आणि व्यवसायास मंजुरी देताना कोणत्या नियमांचे पालन करण्यात आले, याबाबतही प्रश्न उपस्थित होत आहेत.

या प्रकरणात महापालिका प्रशासनाने संबंधित परवानग्या, बांधकामाची वैधता आणि बिअर बार सुरू करण्यामागील निर्णयप्रक्रिया याबाबत स्पष्ट भूमिका जाहीर करावी, अशी मागणी नागरिकांकडून होत आहे. सार्वजनिक मालमत्तेचा वापर करताना महापुरुषांच्या नावाचा सन्मान अबाधित राहील, याची जबाबदारी प्रशासनाने घ्यावी, असेही मत व्यक्त केले जात आहे.

दरम्यान, या प्रकरणावर महापालिका प्रशासन किंवा संबंधित बिअर बार व्यवस्थापनाची अधिकृत प्रतिक्रिया अद्याप समोर आलेली नाही. प्रशासनाकडून स्पष्टीकरण आल्यानंतरच या वादाचे नेमके स्वरूप स्पष्ट होणार आहे.

Kanthak Suryatal