इतवारा पोलिसांची अवैध वाळू माफियांविरुद्ध धडक कारवाई; दोन टिप्पर व टेम्पोसह १० लाख ६५ हजारांचा मुद्देमाल जप्त

नांदेड (प्रतिनिधी)  – नांदेड शहरात अवैध धंद्यांविरोधात सुरू असलेल्या विशेष मोहिमेअंतर्गत इतवारा पोलिसांच्या गुन्हे शोध पथकाने अवैध वाळू वाहतूक करणाऱ्यांविरुद्ध धडक कारवाई केली आहे. या कारवाईत दोन टिप्पर आणि एका टेम्पोसह एकूण १० लाख ६५ हजार रुपयांचा मुद्देमाल जप्त करण्यात आला आहे. शासनाची रॉयल्टी न भरता आणि कोणताही वैध परवाना नसताना वाळूची वाहतूक केल्याप्रकरणी चार जणांविरुद्ध दोन स्वतंत्र गुन्हे दाखल करण्यात आले आहेत.

पोलीस अधीक्षक डॉ. नीलाभ रोहन यांच्या आदेशानुसार जिल्ह्यात अवैध धंद्यांविरोधात विशेष मोहीम राबविण्यात येत आहे. याच मोहिमेअंतर्गत इतवारा पोलीस ठाण्याच्या गुन्हे शोध पथकाने १६ ऑक्टोबर २०२६ रोजी किल्ला रोड आणि एमजीआर गार्डन परिसरात ही कारवाई केली.

पहिली कारवाई : टेम्पोसह २ लाख ५३ हजारांचा मुद्देमाल जप्त

इतवारा पोलीस ठाण्याच्या गुन्हे शोध पथकातील पोलीस उपनिरीक्षक गायकवाड व त्यांचे पथक गस्त घालत असताना किल्ला रोड परिसरात नाबवाटाकडून सराफा दिशेने एक तांबड्या व राखाडी रंगाचा टाटा कंपनीचा टेम्पो (क्रमांक MH-48-T-0529) भरधाव वेगाने जाताना दिसला. पोलिसांनी टेम्पो थांबवून चालकाकडे चौकशी केली. टेम्पोमध्ये वाळू असल्याचे चालकाने सांगितले. त्यानंतर पोलिसांनी गौण खनिज वाहतुकीचा परवाना अर्थात रॉयल्टी टीपीची मागणी केली. मात्र, चालकाकडे कोणताही वैध परवाना नसल्याचे आढळून आले. पोलिसांनी टेम्पोची तपासणी केली असता त्यामध्ये अंदाजे एक ब्रास चोरीची वाळू आढळली. या प्रकरणात सुनील किशन कांबळे (वय ३२, व्यवसाय चालक, रा. चौफाळा, मरघाट, इतवारा, नांदेड) आणि सय्यद अशपाक उर्फ पैलवान सय्यद नूर (वय ३५, वाहनमालक, रा. होळी नाबवाट, इतवारा, नांदेड) यांची नावे समोर आली आहेत. पोलिसांच्या माहितीनुसार, दोघांनी संगनमताने विक्रीच्या उद्देशाने वाळूची विनापरवाना वाहतूक केली. या कारवाईत २ लाख ५० हजार रुपये किमतीचा टेम्पो आणि तीन हजार रुपये किमतीची वाळू, असा एकूण २ लाख ५३ हजार रुपयांचा मुद्देमाल जप्त करण्यात आला. पोलीस अंमलदार बालाजी हिंगणकर यांनी दिलेल्या फिर्यादीवरून इतवारा पोलीस ठाण्यात गुन्हा रजिस्टर क्रमांक ३४५/२०२६ नुसार भारतीय न्याय संहिता कलम ३०३(२), ३(५) तसेच महाराष्ट्र जमीन महसूल संहितेच्या कलम ४८(७) अन्वये गुन्हा दाखल करण्यात आला आहे.

दुसरी कारवाई : दोन टिप्परमधून चार ब्रास वाळू जप्त

इतवारा पोलिसांच्या पथकाने एमजीआर गार्डन परिसरातही अवैध वाळू वाहतुकीविरुद्ध कारवाई केली. देगलूर नाक्याकडून माळटेकडीच्या दिशेने पांढऱ्या व केशरी रंगाचे दोन टिप्पर भरधाव वेगाने जाताना पोलिसांना दिसले. पोलिसांनी दोन्ही वाहने थांबवून चालकांकडे चौकशी केली. या वेळी गिरीश दत्ता भालेराव (वय ३७, व्यवसाय चालक व मालक, रा. गोजेगाव, ता. हदगाव, जि. नांदेड) हा टिप्पर क्रमांक MH-42-T-0623 चालवत होता, तर ज्ञानेश्वर जळबा जाधव (वय ३६, व्यवसाय चालक व मालक, रा. वांगी, ता. जि. नांदेड) हा टिप्पर क्रमांक MH-04-EL-3267 चालवत असल्याचे समोर आले. पोलिसांनी दोन्ही वाहनचालकांकडे गौण खनिज वाहतुकीचा रॉयल्टी परवाना मागितला. मात्र, त्यांच्याकडे कोणताही वैध परवाना नव्हता. दोन्ही टिप्परची तपासणी केली असता प्रत्येक वाहनामध्ये अंदाजे दोन ब्रास याप्रमाणे एकूण चार ब्रास चोरीची वाळू आढळून आली. पोलिसांनी ४ लाख रुपये किमतीचा पहिला टिप्पर आणि त्यातील सहा हजार रुपये किमतीची वाळू, तसेच चार लाख रुपये किमतीचा दुसरा टिप्पर आणि त्यातील सहा हजार रुपये किमतीची वाळू जप्त केली. या कारवाईत एकूण ८ लाख १२ हजार रुपयांचा मुद्देमाल पोलिसांच्या ताब्यात घेण्यात आला. या प्रकरणी पोलीस अंमलदार ईसराईल शेख यांनी दिलेल्या लेखी फिर्यादीवरून इतवारा पोलीस ठाण्यात गुन्हा रजिस्टर क्रमांक ३४६/२०२६ नुसार भारतीय न्याय संहिता कलम ३०३(२), ३(५) तसेच महाराष्ट्र जमीन महसूल संहितेच्या कलम ४८(७) अन्वये गुन्हा दाखल करण्यात आला आहे.

पोलीस अधीक्षकांच्या मार्गदर्शनाखाली कारवाई

ही कारवाई पोलीस अधीक्षक डॉ. नीलाभ रोहन यांच्या आदेशानुसार, पोलीस निरीक्षक सिद्धेश्वर कैलासे यांच्या मार्गदर्शनाखाली पोलीस उपनिरीक्षक जळबाजी गायकवाड, पोलीस उपनिरीक्षक सिद्धेश्वर देशमुख, पोलीस हवालदार बंडू कलंदर, बालाजी हिंगणकर, सदाशिव कदम, रेवन्नाथ कोरनुळे, हरिप्रतिसिंह सुखई, शेख ईसराईल, साहेबराव जगताप आणि मारोती गिते यांच्या पथकाने केली.

अवैध धंद्यांची माहिती पोलिसांना देण्याचे आवाहन

नांदेड जिल्ह्यात अवैध वाळू उत्खनन, विनापरवाना वाळू वाहतूक, जुगार किंवा अन्य बेकायदेशीर प्रकार सुरू असल्याचे नागरिकांच्या निदर्शनास आल्यास त्यांनी तत्काळ पोलिसांना माहिती द्यावी, असे आवाहन नांदेड जिल्हा पोलिसांकडून करण्यात आले आहे.