तरुणावर खंजिराने हल्ला; खुनाचा प्रयत्न केल्याप्रकरणी पाच जणांविरुद्ध गुन्हा

पोलिसांनी दिलेल्या माहितीनुसार, प्रभातनगर, नागसेन शाळेच्या ग्राउंड परिसरात ही घटना घडली. फिर्यादी साहिल ओंकार केजकर (वय १९, रा. हनुमान कॉलनी, नांदेड) याने दिलेल्या तक्रारीनुसार, मोनू पुंडगे, लक्की हटकर, लक्की हटकरचा भाऊ, गौरव थोरात, सुंदर भगत तसेच इतर काही जणांनी संगनमत करून त्याला अडविले.

यावेळी संशयितांनी फिर्यादीला शिवीगाळ करत, ‘‘तू माझी बदनामी का करतोस?’’ असे म्हणत २० हजार रुपयांची खंडणीची मागणी केल्याचे तक्रारीत नमूद आहे. फिर्यादीने पैसे नसल्याचे सांगितल्यानंतर आरोपींनी त्याला जिवे मारण्याच्या उद्देशाने खंजिराने मारहाण करून गंभीर जखमी केल्याचा आरोप आहे. तसेच जिवे मारण्याची धमकी दिल्याचेही तक्रारीत म्हटले आहे.या हल्ल्यात फिर्यादीचा मोबाईल फोन फोडून सुमारे १५ हजार रुपयांचे नुकसान केल्याचे पोलिसांकडे दिलेल्या तक्रारीत नमूद करण्यात आले आहे. या प्रकरणी भाग्यनगर पोलीस ठाण्यात गुन्हा क्रमांक ५३७/२०२६ अन्वये भारतीय न्याय संहिता (BNS) २०२३ मधील कलम १०९(१), ३०८(४), ११८(१), ११५(२), ३५२, ३५१(३), १२७(२), ३२४(२), १८९(२), १९०, १९१(२), १९१(३) तसेच महाराष्ट्र संघटित गुन्हेगारीसंदर्भातील नमूद तरतुदींनुसार गुन्हा दाखल करण्यात आला आहे. या प्रकरणाचा तपास पोलीस उपनिरीक्षक विनोद देशमुख करीत असून, पोलिसांनी संबंधित आरोपींवर अटकेची कारवाई केली असल्याचे तक्रारीत नमूद आहे. प्रकरणाचा पुढील तपास सुरू आहे.