महिला पोलीस सहकाऱ्याचा विनयभंग करणाऱ्या पोलीस चालकाचे निलंबन

रक्षकच भक्षक बनल्याने पोलीस दलाची प्रतिमा मलीन

नांदेड (प्रतिनिधी)-  समाजाचे रक्षण करण्याची जबाबदारी ज्यांच्या खांद्यावर आहे, त्याच पोलीस दलातील एका कर्मचाऱ्याने आपल्याच महिला सहकाऱ्याचा विनयभंग केल्याचा धक्कादायक प्रकार नांदेडमध्ये उघडकीस आला आहे. या गंभीर प्रकरणाची दखल घेत नांदेडचे पोलीस अधीक्षक अबिनाश कुमार यांनी मोटर परिवहन विभागातील पोलीस चालक संजय पांडुरंग जाधव यांना तातडीने शासकीय सेवेतून निलंबित केले आहे.

नेमकी घटना आणि पोलिसांची जबाबदारी: पोलीस दल हे शिस्तबद्ध आणि महिलांच्या सुरक्षेसाठी वचनबद्ध असलेले दल मानले जाते. मात्र, चालक संजय जाधव यांनी या पदाचा गैरवापर करत एका महिला पोलीस शिपायाला प्रचंड मानसिक त्रास दिला. जाधव यांनी  महिला कर्मचाऱ्याकडे शरीर सुखाची मागणी केली आणि त्यांच्याशी अश्लील भाषेत संभाषण केले. इतकेच नव्हे तर, कर्तव्यावर असताना त्यांनी महिलेच्या खांद्यावर व हाताला स्पर्श करून लज्जास्पद वर्तन केल्याचे प्राथमिक चौकशीत समोर आले आहे. पोलीस दलात काम करणाऱ्या महिला कर्मचाऱ्यांना सुरक्षित वातावरण देणे ही विभागाची नैतिक आणि कायदेशीर जबाबदारी आहे. जेव्हा एखादा पोलीस कर्मचारी स्वतःच्या विभागातील महिला सहकाऱ्यासोबत असे नीच कृत्य करतो, तेव्हा तो केवळ एका व्यक्तीचा नाही तर संपूर्ण पोलीस दलाच्या विश्वासाला तडा देतो.

सर्वसामान्यांचा दृष्टिकोन आणि संताप: या घटनेमुळे सर्वसामान्य लोकांचा पोलिसांकडे पाहण्याचा दृष्टिकोन नकारात्मक होण्याची भीती निर्माण झाली आहे. समाजात शांतता आणि सुरक्षा राखण्याची जबाबदारी असलेल्या पोलिसांकडून नागरिक मदतीची अपेक्षा ठेवतात. परंतु, जर पोलीस दलातच महिला सुरक्षित नसतील, तर सर्वसामान्य महिलांनी न्याय कोणाकडे मागायचा? असा संतप्त सवाल नागरिक उपस्थित करत आहेत. अशा प्रकारच्या घटनांमुळे पोलिसांबद्दलचा आदर कमी होऊन भीती आणि अविश्वासाचे वातावरण निर्माण होते.

संजय जाधव यांच्या निलंबन आदेशात आपण आणि पोलीस निरीक्षक चोपडे यांनी हे कृत्य केले असल्याचा उल्लेख आहे.पण अद्याप मोटार परिवहन विभागाचे पोलीस निरीक्षक दिलीप चोपडे यांच्या संदर्भाने काय निर्णय झाला याची माहिती प्राप्त झाली नाही.  

Kanthak Suryatal