नांदेडमध्ये व्हीआयपी रोडवरील दुकान व भाजप कार्यालय पोकलेनने पाडले; कोटगीरे माय-लेकांसह १५ जणांवर गुन्हा दाखल

नांदेड (प्रतिनिधी) –  नांदेड येथील व्हीआयपी रोड परिसरातील मोक्याच्या जागेवरून झालेल्या वादातून फर्निचरचे दुकान आणि भाजप जनसंपर्क कार्यालय पोकलेन मशीनच्या साह्याने पाडून तोडफोड केल्याप्रकरणी तसेच चोरीप्रकरणी शिवाजीनगर पोलीस ठाण्यात गुन्हा दाखल करण्यात आला आहे. याप्रकरणी आशिष माधवराव कोटगीरे, प्रभादेवी माधवराव कोटगीरे आणि १० ते १५ अज्ञात साथीदारांविरुद्ध विविध कलमांखाली गुन्हा नोंदवण्यात आला आहे.

नेमकी घटना आणि पार्श्वभूमी: तक्रारदार तुलजाराम कालुराम यादव, वय ५६, रा. व्हीआयपी रोड, नांदेड यांनी दिलेल्या तक्रारीनुसार, व्हीआयपी रोडवरील सिटी सर्व्हे क्र. ६१६० मधील प्लॉट क्र. ६, ७ आणि ८ ही जागा त्यांनी ९ मे २००८ रोजी माधवराव विठ्ठलराव कोटगीरे यांच्याकडून खरेदी केली होती. माधवराव कोटगीरे यांच्या निधनानंतर सदर जागेची खरेदीखत नोंदणी प्रलंबित असल्याने नांदेड दिवाणी न्यायालयात विशेष दिवाणी दावा क्र. ४१/२०२२ अंतर्गत खटला न्यायप्रविष्ट आहे. या जागेवर यादव यांचे फर्निचरचे दुकान तसेच भारतीय जनता पार्टी शहर जिल्हा उपाध्यक्ष संपर्क कार्यालय, प्रभाग क्र. ९ सुरु होते.

धमकी आणि मध्यरात्री पोकलेनने तोडफोड: तक्रारीनुसार, १० डिसेंबर २०२२ रोजी आरोपी आशिष कोटगीरे याने ३ अज्ञात गुंडांना सोबत आणून जागा खाली कर, नाहीतर तुझे अपहरण करून निजामाबादच्या तलावात फेकून देईन अशी जिवे मारण्याची धमकी दिली होती. त्यानंतर १ जून २०२४ रोजी मध्यरात्रीच्या सुमारास आरोपींनी बेकायदेशीर जमाव जमवून पोकलेन मशीनच्या साह्याने दुकान व भाजप कार्यालय पाडून टाकले. या तोडफोडीमध्ये दुकानातील १० ते १२ हजार रुपयांची रोकड, फर्निचर, सागवानी दरवाजे, इलेक्ट्रिक मीटर क्र. ५५००११८१०३६५ आणि न्यायालयात दाखल असलेली मूळ महत्त्वाची कागदपत्रे चोरून नेल्याचा आरोप करण्यात आला आहे.

पोलीस कारवाई व तपास: याप्रकरणी शिवाजीनगर पोलीस ठाण्यात १९ ऑक्टोबर २०२६ रोजी एफआयआर क्र. ०४४९/२०२६ अन्वये भारतीय दंड संहितेच्या ३७९, २९४, ४४७, १२०-ब, १४३, १४४, ४०६, ४८२, ५०४, ५०६ आणि ३४ या कलमांखाली गुन्हा नोंदवण्यात आला आहे. पोलीस निरीक्षक राजेश अशोकराव पुरी या प्रकरणाचा पुढील तपास करत आहेत.

Kanthak Suryatal