तीन जणांना अटक 23 तोळे सोने जप्त
हदगाव(प्रतिनिधी)-अपर पोलीस अधिक्षक विजय कबाडे यांच्या हद्दीतील हदगाव येथे डॉक्टरच्या घरावर दरोडेखोरांनी जबर दरोडा केला होता. हा प्रकार 16 जुलैच्या रात्री घडला होता. या घटनेला दहा दिवस पुर्ण होताच स्थानिक गुन्हा शाखेने जबरदसत कामगिरी करून तीन दरोडेखोरांना अटक केली आहे. त्यांच्याकडून 23 तोळे सोने जप्त करण्यात आले आहेत. जवळपास 12 लाख रुपयांचा चोरीचा ऐवज स्थानिक गुन्हा शाखेने जप्त करून आपल्या कामाचा शिक्का गाजवला आहे.दि.16 जुलैच्या रात्री हदगाव येथील यादवअप्पा गंदेवार (104) आणि त्यांच्या पत्नी वय 100 यांच्यासह अनेक कुटूंबीय हदगाव शहरातील मोठ्या घरात राहत होते. वडीलोपार्जित पध्दतीने हे घराणे श्रीमंत मानले जाते. 16 तारेखेच्या रात्री त्यांच्या घराच्या पाठीमागील दारातून काही दरोडेखोर आत घुसले. त्या दरोडेखोरांनी 100 पेक्षा जास्त वय असलेल्या पती-पत्नीला, इतर मंडळीला मारहाण केली आणि सहा महिन्याचे बाळ आपल्या हातात घेवून त्याच्या गळ्यावर चाकू ठेवला आणि संपत्तीची विचारणा केली. या परिस्थितीत कुटूंबासमोर दुसरा पर्याय नव्हता. दरोडेखोरांनी तेथून चाब्या हस्तगत करून जवळपास 71 तोळे सोने आणि 70 हजार रुपये रोख रक्कम असा एकूण 40 लाखांचा ऐवज बळजबरीने चोरून नेला होता. घटना घडताच स्थानिक गुन्हा शाखेचे पोलीस निरिक्षक द्वारकादास चिखलीकर यांच्या नेतृत्वात स्थानिक गुन्हा शाखेचे पथक कामाला लागले. नव्याने स्थानिक गुन्हा शाखेत रुजू झालेले सहाय्यक पोलीस निरिक्षक शिवसांब घेवारे, पोलीस उपनिरिक्षक सचिन सोनवणे, पोलीस कर्मचारी गंगाधर कदम, हजेरी मेजर सखाराम नवघरे, देविदास चव्हाण, गुंडेराव कर्ले, संजीव जिंकलवाड, मोतीराम पवार यांनी घडलेल्या गुन्ह्याचा सखोल अभ्यास करून त्याची माहिती पोलीस निरिक्षक द्वारकादास चिखलीकर यांना दिली. त्यांच्या मार्गदर्शनात त्यांनी लक्ष्मण मेटकर रा.सिध्दनाथपुरी नांदेड, दशरथ देवकर रा.हदगाव आणि राजू देवकर रा.बटाळा या तिघांना पकडले. तपासाच्या प्रक्रियेत जवळपास 23 तोळे सोने अर्थात 13 लाखांचा ऐवज जप्त केला आहे. त्यांना काल रात्री अटक करण्यात आली असून या प्रकरणाचा तपास स्थानिक गुन्हा शाखेतील पोलीस उपनिरिक्षक आशिष बोराटे यांच्याकडे देण्यात आला आहे.या दरोड्यातील आणखी बऱ्याच लोकांना अटक करणे आहे त्यांचा आम्ही शोध घेत आहोत अशी माहिती पोलीस निरिक्षक द्वारकादास चिखलीकर यांनी दिली. पकडलेले आणि फरार असलेले दरोडेखोरे काही दिवसांपुर्वीच तेलंगणा राज्यातील कायद्याच्या तरतुदीनुसार महाराष्ट्रातील मकोका अशा प्रकारच्या गुन्ह्यात तुरूंगात होते आणि सुटल्याबरोबर त्यांनी हदगाव येथे दरोडा टाकला आहे. या प्रकरणातील सहभागी दरोडेखोर आणखी किती गुन्ह्यांमध्ये हवे आहेत याचा शोध घेत आहोत. या लोकांच्या अटकेमुळे दरोड्यांच्या गुन्ह्यांवर नक्कीच काही जरब येईल असे चिखलीकर यांनी सांगितले. या प्रकरणात या घरात ऐवढी संपत्ती आहे अशी माहिती देणारा कोण याचाही शोध आम्ही घेत आहोत त्याचाही माग आम्ही लवकरच काढू असा विश्र्वास चिखलीकर यांनी व्यक्त केला.
संबंधीत बातमी…
