नांदेड,(प्रतिनिधी)-बरड शेवाळा जवळील वळण रस्त्यावरच्या पुलाखाली ढकलून देवून डोक्यावर दगड टाकून भिमरावचा खून करणाऱ्या भिमरावला हदगाव प्रथमवर्ग न्यायदंडाधिकारी न्यायालयातील न्यायाधीश सुविधा पांडे यांनी तीन दिवस पोलीस कोठडीत पाठविले आहे.
किरण भिमराव जमदाडे यांनी दिलेल्या तक्रारीनुसार 2 मार्चच्या सायंकाळी 6.30 ते 7.30 वाजेदरम्यान बरडशेवाळा जवळील वळण रस्त्याच्या बाजूला असलेल्या नाल्यामध्ये त्याच्या वडीलांचा खून झाला. किरण जमदाडेने दिलेल्या तक्रारीनुसार भिमराव तुकाराम जमदाडे (60) रा.बरशेवाळा यांना गावातील भिमराव सोमाजी जमदाडे (45) याने मला दारु का पाजत नाहीस असे सांगून वडीलांसोबत झटापट करून त्यांना वळण रस्त्यावरील पुलावरून खाली सिमेंटच्या नाल्यामध्ये ढकलून जिवे मारण्याच्या उद्देशाने त्याच्या डोक्यावर दगड टाकून त्यांचा खून केला आहे.
मनाठा पोलीसांनी याप्रकरणी गुन्हा क्रमांक 65/2022 भारतीय दंड संहितेच्या कलम 302, 504 नुसार दाखल केला आहे. मनाठाचे सहाय्यक पोलीस निरिक्षक विनोद चव्हाण यांनी खून करणाऱ्या भिमराव सोमाजी जमदाडे यांना ताब्यात घेतले. आज 4 एप्रिल रोजी या खून प्रकरणातील मारेकरी भिमराव सोमाजी जमदाडे यास हदगाव न्यायालयात हजर केले. सरकारी वकील ऍड. गिरीष मोरे यांनी पोलीस कोठडी देणे का आवश्यक आहे याचे सादरीकरण न्यायालयासमक्ष केल्यानंतर न्यायाधीश सुविधा पांडे यांनी भिमरावचा खून करणाऱ्या भिमराव सोमाजी जमदाडेला तीन दिवस अर्थात 7 एप्रिल 2022 पर्यंत पोलीस कोठडीत पाठविले आहे.
