नांदेड(प्रतिनिधी)-12 जुलै ते 16 जुलै दरम्यान नांदेड जिल्ह्यात कांही ठिकाणी विजेच्या कडकडाटांसह आणि ढगांच्या गडगडाटांसह मुसळधार ते अति मुसळधार पाऊस पडण्याची शक्यता असल्याचा अंदाज प्रादेशिक हवामान केंद्र मुंबई यांनी दिला आहे. त्यानुसार निवासी उपजिल्हाधिकारी प्रदीप कुलकर्णी यांनी जनतेला खबरदारीच्या सुचना जारी केल्या आहेत.
प्रादेशिक हवामान केंद्र मुंबई यांनी 12 जुलै रोजी 1 वाजता दिलेल्या सुचनेनुसार 12 जुलै ते 16 जुलै दरम्यान नांदेड जिल्ह्यात मुसळधार ते अतिमुसळधार पाऊस पडण्याची शक्यता आहे. अशा परिस्थितीत जनतेने सावधान राहावे. अशा प्रसंगी काय करावे आणि काय करू नये या संदर्भाने निवासी उपजिल्हाधिकारी प्रदीप कुलकर्णी यांनी सुचना जारी केल्या आहेत.
ही कामे करा
विजेच्या आवाजासह पावसाची पुर्व कल्पना असल्यास बाहेर जाणे टाळा. मोकळ्या जागेत उभे असला तर जवळच्या कुठल्याही सुरक्षीत इमारतीचा आसरा नसेल तर सखल जागेत जाऊन गुडघ्यात डोके घालून बसा. आकाशात वीजा चमकत असल्यास घरा किंवा सुरक्षीत इमारतीत आसरा घ्या. घराची बाल्कनी, छत, घराबाहेरील ओट्यावर बसू नका. आपण घरात असाल आणि घरातील विद्युत उपकरणे चालू असतील तर ते बंद करा. तारांचे कुंपन, वीजेचे खांब आणि इतर लोखंडी वस्तूंपासून दुर राहा. पाण्यात उभे असताल तर तात्काळ पाण्यातून बाहेर पडा.
ही कामे करू नका
आकाशात वीजा चमकत असल्यास घरातील लॅंडलाईन फोनचा वापर करू नका. शावरखाली अंघोळ करू नका. घरातील बेसीनचे नळ, पाण्याची पाईपलाईन यांना स्पर्श करू नका आणि कुठल्याही विद्युत उपकरणाचा वापर करू नका. विजेच्या गडगडाटासह वादळी वारे चालू असल्यास लोखंडी धातूच्या सहाय्याने उभारलेल्या तंबूमध्ये किंवा शेडमध्ये आसरा घेवू नका. उंच झाडाखाली आसरा घेवू नका. धातूच्या उंच मनोऱ्याजवळ उभे टाकू नका. आपण घरात असताल तर उघड्या दारातून किंवा खिडकीतून विज पडतांना पाहु नका कारण ते बाहेर थांबण्या इतकेच धोकादायक आहे.
